Sekretari i Përgjithshëm i NATO-s, Jens Stoltenberg ka komentuar bombardimet e Aleancës mbi Serbi në konfliktin e Kosovës në pranverë të ’99-ës, duke thënë se shumë serbë ende kanë kujtime të këqija nga ajo kohë, porse bombardimet u bënë me qëllim që të mbrohen civilët nga masakrat e Millosheviçcit.
Komentet e tij kreut të Aleancës Atlantike u bënë gjatë një prononcimi për Televizionin Shtetëror serb, në ditën e parë të vizitës së tij në Beograd.
“E theksoj se ajo që bëmë ishte për të mbrojtur civilët dhe për të ndaluar regjimin e Millosheviçit. Por mesazhi im më i rëndësishëm është se ne duhet të shohim në të ardhmen”, ka thënë Stoltenberg, pas një ligjërate në Fakultetin e Filologjisë.
Ai shtoi se NATO mbështet dialogun midis Beogradit dhe Prishtinës, dhe jo vetëm politikisht.
“Dialogu është i nevojshëm për tejkalimin e dallimeve dhe gjetjen e një zgjidhje politike. NATO e mbështet atë, jo vetëm politikisht, por edhe për shkak se ne jemi të pranishëm në Kosovë si KFOR, i ngarkuar me ruajtjen e sigurisë. Ne do të vazhdojmë të jemi atje për t’i mbrojtur të gjitha komunitetet”, tha Stoltenberg.
Ai shtoi se Serbia ka thënë qartë se qëllimi i saj nuk ishte të bëhej anëtar i Aleancës.
“Ne respektojmë çdo vendim të një shteti sovran që dëshiron të bashkohet me NATO-n apo jo. Ne kemi një marrëdhënie të shkëlqyer me Serbinë dhe ne e respektojmë vendimin e saj për të mos iu bashkuar NATO-s, por ajo do të jetë një partner. Kjo është mirë për Serbinë, kjo është e mirë për NATO-n”, tha Sekretari i Përgjithshëm i Aleancës. /tesheshi.com/
