Stoltenberg me Osmanin: Ai i mëshon dialogut, ajo ndëshkimit

Sekretari i Përgjithshëm i NATO-s, Jens Stoltenberg, pas takimit me presidenten e Kosovës, Vjosa Osmani, tha se NATO-ja mbështet dialogun ndërmjet Kosovës dhe Serbisë, “sepse paqja dhe siguria mund të ruhen vetëm përmes dialogut”.

Në një konferencë të përbashkët për media me Osmanin, Stoltenberg tha se sulmet ndaj ushtarëve të KFOR-it në maj në Zveçan, si dhe sulmi i dhunshëm i 24 shtatorit në Banjska ku mbeti i vrarë një polic i Kosovës, janë të papranueshme dhe se autorët duhet të mbajnë përgjegjësi.

Ai tha se pas atij sulmi, NATO reagoi shpejt dhe solli 1000 trupa në Kosovë si përforcime të KFOR-it. U dërguan gjithashtu armë më të rënda dhe patrullimet në veri u shtuan.

“Ne do të bëjmë atë që është e nevojshme për të ruajtur një mjedis të sigurt dhe lëvizje të lirë për të gjithë njerëzit në Kosovë. Stabiliteti në rajon vendoset nga të gjitha palët që duhet të zgjedhin diplomacinë në vend të dhunës dhe të ruajnë detyrimet ekzistuese”, theksoi Stoltenberg.

Kreu i NATO-s tha se mirëpret propozimin e fundit të statutit evropian për formimin e komunitetit të komunave me shumicë serbe në Kosovë (ZSO), si një hap i rëndësishëm dhe vendimtar drejt normalizimit të marrëdhënieve ndërmjet Kosovës dhe Serbisë.

“Duhet ndëshkimi i Serbisë”

Osmani tha se sulmi në Banjskë ishte “një akt i agresionit serb kundër Kosovës”. Ajo tha se Serbia në vend që t’i dorëzojë në Kosovë autorët e atij sulmi, vazhdon të organizojë grupe të tilla. Sipas saj, duhet ndëshkuar Serbia që një gjë e tillë të mos përsëritet.

“Nëse Serbia nuk përballet me asnjë masë për këto sulme të vazhdueshme, do të jetë një nxitje e re për të që të sulmojë sërish Kosovën dhe të destabilizojë rajonin. Në këtë kontekst, roli kyç i NATO-s dhe KFOR-it është në parandalimin e destabilizimit, jo vetëm në Kosovë, sepse Serbia mbetet kërcënim i vazhdueshëm për paqen dhe stabilitetin në gjithë rajonin tonë”, theksoi Osmani.

Ajo shtoi se Kosova është e gatshme të bashkëpunojë me KFOR-in, sepse Kosova dhe NATO janë në të njëjtën anë. Ajo ka theksuar se anëtarësimi në NATO është i një rëndësie ekzistenciale për Kosovën.

Stoltenberg është takuar edhe me kryeministrin Albin Kurti, ndërsa do të vizitojë edhe kampin e KFOR-it “Nothing Hill” afër Leposaviqit, ku do të takohet me komandantin e KFOR-it, gjeneralmajor Ozkan Ulutas dhe do t’u drejtohet ushtarëve.

Stoltenberg ndodhet në Kosovë në kuadër të turneut të tij ballkanik. /tesheshi.com/