Sekretari i Përgjithshëm i NATO-s, Jens Stoltenberg, tha të mërkurën se siguria në Kosovë është çelësi i stabilitetit në të gjithë rajonin e Ballkanit Perëndimor.
Ai këtë e tha në një fjalim dyminutësh të publikuar në rrjetin social X me rastin e fundvitit, në të cilin falënderoi të gjithë aleatët për mbështetjen e tyre, si dhe trupat, përfshirë KFOR-in në Kosovë, për shërbimin e tij në mbrojtje të paqes.
“Ndihma për të ruajtur një mjedis paqësor dhe të sigurt për të gjithë në Kosovë është çelësi i stabilitetit të rajonit më të gjerë të Ballkanit Perëndimor”, tha ai.
Stoltenberg tha se “ne jetojmë në një botë të rrezikshme”, në të cilën ka një luftë në Evropë, një luftë të re në Lindjen e Mesme, ndërsa tensionet po rriten edhe në Ballkanin Perëndimor.
Përshkallëzimi i konfliktit në Kosovë
“Terrorizmi brutal vazhdon dhe ndryshimi i klimës shkakton konflikte. Dhe kjo është arsyeja pse nuk ka siguri pa një mbrojtje të fortë, dhe nuk ka mbrojtje të fortë pa një forcë të armatosur të aftë. Dhe kjo është arsyeja pse ne ndërmorëm kaq shumë hapa të rëndësishëm këtë vit për të forcuar mbrojtjen e NATO-s me akoma më shumë trupa dhe rritje të shpenzimeve të mbrojtjes. Dhe kjo nuk është për të shkaktuar luftë, por për të parandaluar konfliktin dhe për të ruajtur paqen”, tha Stoltenberg.
Marrëdhëniet mes Serbisë dhe Kosovës u përshkallëzuan me sulmin e një grupi serbësh në fshatin Banjskë, në veri të Kosovës, të udhëhequr nga ish-nënkryetari i Listës Serbe, Milan Radoiçiç.
Gjatë konfliktit u vra një pjesëtar i policisë së Kosovës dhe tre sulmues serbë.
Në një njoftim publik, Radoiçiç pranoi se e kishte organizuar këtë sulm, por hodhi poshtë akuzat se këtë e kishte bërë me direktivë të Beogradit zyrtar. /tesheshi.com/
