Sekretari i Përgjithshëm i NATO-s, Jens Stoltenberg duhet të arrijë sot për një vizitë treditore në Turqi, njoftoi Ministria e Punëve të Jashtme të këtij vendi.
Ministria njoftoi se Stoltenberg do të bisedojë me presidentin turk Rexhep Tajip Erdogan, si dhe me ministrin e Jashtëm Mevlut Çavusoglu dhe ministrin e Mbrojtjes Hulusi Akar.
Pritet që në fokus të bisedimeve të jetë zgjatja e Marrëveshjes së grurit të Stambollit dhe kandidatura e Suedisë dhe Finlandës për anëtarësim në NATO.
Zgjerimi i NATO-s
Suedia dhe Finlanda aplikuan zyrtarisht për t’u anëtarësuar në NATO në qershor të këtij viti, një vendim i nxitur nga lufta e Rusisë kundër Ukrainës.
Megjithatë, si një anëtare e NATO-s, Turqia ka shprehur kundërshtime ndaj ofertave të tyre për anëtarësim, duke kritikuar Suedinë dhe Finlandën për tolerimin dhe madje mbështetjen e grupeve që Turqia i konsideron terroriste.
Parlamenti turk duhet të ratifikojë miratimin që Suedia dhe Finlanda të bëhen anëtarë të rinj të NATO-s. /tesheshi.com/
