Shkelja e hapësirës ajrore të Turqisë nga avionët rusë nuk duket si aksidentale, njoftoi NATO. Sekretari i Përgjithshëm i aleancës, Jens Stoltenberg tha se Rusia nuk ka dhënë asnjë shpjegim real për këtë shkelje e cila zgjati për një kohë të gjatë.
Moska ka deklaruar deri tani se shkelja e parë e hapësirës ajrore turke ditën e shtunë zgjati vetëm pak sekonda dhe se për pretendimet për një shkelje të dytë të dielën, është duke hetuar.
Sulmet e fundit ajrore të Rusisë në Siri përfshinin edhe disa vendndodhje në Palmyra. Avionët goditën mjete dhe depo armësh në dhe rreth qytetit, që njihet për rrënojat antike e që ndodhet në duart e ISIS.
Sulmet ajrore ruse thuhet se kanë në shënjestër objektiva të ISIS, por NATO dhe aleatët kanë shprehur shqetësimin se Moska po sulmon grupime të opozitës së moderuar siriane që kundërshtojnë regjimin e presidentit al Assad dhe që mbështeten nga perëndimi.
Turqia ka thirrur dy herë ambsadorin rus në Ankara për të kërkuar shpjegime për shkeljen e hapësirës ajrore, ndërsa po heton edhe një incident të tretë, me një avion, që mund të ketë qenë sirian.
Presidenti turk, Recep Tayyip Erdogan tha se “një sulm mbi Turqinë do të thotë sulm mbi NATO-n”.
“Marrëdhënia jonë pozitive me Rusinë është e njohur , por nëse Rusia humbet një vend mik si Turqia, me të cilin bashkëpunon në shumë fusha, duhet të dijë se do të humbasë shumë”, tha ai. /tesheshi.com/
