Disa persona të maskuar u ndaluan nga policia në Stokholm ndërsa shpërndanin fletëpalosje ku kërcënonin me dënime “fëmijët afrikanoveriorë që janë dyndur rrugëve” të kryeqytetit suedez.
Policia tha se një prej këtyre personave të ndaluar është akuzuar për agression ndaj një oficeri ndërsa mbi të tjerët rëndon akuza e mbajtjes së maskave në publik, gjë që është e paligjshme në Suedi, dhe se kanë shkaktuar shqetësim publik.
Një zëdhënës i policisë tha për median lokale se burrat e ndaluar besohet ishin mbledhur me qëllim që të sulmonin fëmijët refugjatë.
Sipas gazetës suedeze, Aftonbladet, pothuajse 100 persona të maskuar marshuan në qendër të Stokholmit, ditën e premte për të shpërndarë fletëpalosje që mbanin mesazhin: “Mjaft tani”. Në fletët e shpërndara kërcënohej se do t’u jepnin “dënimin e merituar fëmijëve afrikanoveriorë që kanë mbushur rrugët”.
Fredrik Nylén nga policia e Stokholmit, citohet nga gazeta të ketë thënë se burrat mendohen të jenë anëtarë të bandave të huliganëve të lidhur me ekipet e tifozëve të futbollit.
Këtë javë, një punonjëse në një qendër refugjatësh për të miturit e pashoqëruar në Mölndal, afër Gothenburg, u qëllua për vdekje, e dyshohet se ajo u vra nga një person i kësaj qendre.
Vrasja e 22-vjeçares Alexandra Mezher, ka ngritur dyshime për kushtet në qendrat e mbipopulluara të refugjatëve, në disa prej të cilave ka shumë pak staf, të rritur dhe punonjës që të kujdesen për fëmijët, shumë prej të cilëve janë të traumatizuar nga lufta.
Kryeministri suedez Stefan Löfven pasi vizitoi kampin në Mölndal tha:
“Unë mendoj se shumë njerëz janë të shqetësuar që mund të ketë akte të tjera dhune pasi Suedia ka pritur shumë fëmijë e të rinj të pashoqëruar. Shumë prej tyre që kanë mbërritur kaq të rinj në Suedi kanë përvoja traumatike, dhe nuk ka zgjidhje të lehta”.
Sipas agjencisë suedeze të Migracionit, numri i kërcënimeve dhe incidenteve të dhunshme në strehat e azilkërkuesve është më shumë se dyfishuar në vitin 2015 krahasuar me vitin e mëparshëm, ndërsa Suedia priti një numër rekord refugjatësh të rinj. Numri i sulmeve zjarrvënëse që kanë si shënjestër qendrat e refugjatëve është rritur poashtu, pasi dhjetëra qendra janë shkatërruar apo dëmtuar nga zjarri vitin që kaloi.
Suedia priti 160 mijë azilkërkues vitin e kaluar, por numri i mbërritjeve ka rënë që kur në kufi nisën këtë muaj kontrollet e kartave të identitetit. Përgatiti: Juli Prifti – /tesheshi.com/
