Tek ne në Shqipëri është e vështirë të hasësh ndonjë qeveritar që sakrifikon diç nga vetja për hir të shoqërisë. Modeli i tyre i deritanishëm, lloji i qeverisjes që ushtrojnë, në qendër a bazë qoftë, është ai i “fshatarit të ardhur në qytet”, që pos shock-ut që pëson nga destini i ri tërheqës, nis të mendojë se si të gëzojë gjithë atë çka sheh rreth e rrotull.
Në mendësinë e tij nuk funksionin më ideja e shërbimit ndaj njerëzve, por një aktrim pozite për hir të rrogës, si dhe investimi për të nesërmen ku nuk do jetë më me pozitë, me mentalitetin shejtanesk se “ky shans nuk të vjen për herë të dytë”.
Kosova gjithsesi e ka një model ndryshe, Rufki Suma, kreu u komunës së Hanit të Elezit, i cili ka “rekorde morale” në qeverisjen lokale. Por në Shqipëri zorr se e has një të tillë.
Ndërsa në rajon, vjen shembulli i kroatit Stipe Ursiç, 30 vjeç, kryetari i komunës Brela në Rivierën e Makarskës, i cili ka hyrë tashmë në historinë si njeriu që ia uli vetes pagën dhe honoraret.
Në një prononcim për Anadolu Agency, Ursiç tha tha se kishte shumë plane për komunën të cilën po e udhëhiqte, porse në fillim kishte ulur pagën e tij, kishte hequr shpenzimet e udhëtimit, si dhe kishte rritur ndihmat për të posalindurit.
“Është e vërtetë se kemi miratuar shumë masa shtrënguese dhe kështu do të vazhdojmë. Kemi reduktuar shpenzimet operative me 70 përqind; kemi ulur koston e telefonave celularë, kemi hequr shpenzimet e ardhjes dhe shkuarjes në punë, kemi rishikuar të gjitha kontratat ekzistuese dhe kemi kërkuar kushte më të mira. Me modernizimin e ndriçimit, kalimi në teknologjinë LED, ne kursejmë 500.000 kuna në vit (rreth 67.000 euro)”, tha Ursiç.
Kujtojmë që Kroacia është ndër vendet më të begata dhe më pak “ballkanike” në disa drejtime. Deri më tani, ky vend mbahet kampion në rajon përsa i përket çuarjes në burg të të korruptuarve, ku veçohet ish-kryeministri Ivo Sanader, i cili është prej vitesh pas hekurave, edhe pse politikisht ishte një figurë simpatike. /tesheshi.com/
