“Mesazhi të cilin në Shkup e dha diplomati amerikan Yee, është deklarata më serioze që është dërguar kundër qeverisë së maqedonisë në 20 vitet e fundit”, ka komentuar kështu profesori i politikës ndërkombëtare, Stevo Pendarovski, pasi më herët përfaqësuesi i Departamentit Amerikan, Hoyt Yee, kërkoi nga qeveria e Maqedonisë t`i ndëshkojë rastet e keqpërdorimit të pushtetit nga zyrtarë qeveritarë, me të njëjtin seriozitet siç po i qaset liderit të opozitës Zoran Zaev, të cilin e ka akuzuar për grusht shtet.
Yee, potencoi problemin real në Maqedoni, ndërsa këtë nuk e tha në mënyrë diplomatike, siç jemi mësuar të dëgjojmë, por e bëri në mënyrë direkte dhe eksplicite. “Pas takimit me Gruevskin, tha se seriozisht duhet hetuar keqpërdorimet e pushtetit. Kjo nuk ka ndodhur më herët”, tha Pendarovski, i cili pret prani më të madhe të diplomacisë amerikane për zgjidhje të krizës.
Zëvendës-ndihmësi i Sekretarit Amerikan të Shtetit për Evropën dhe Azinë, Hoyt Yee, pas takimit që kishte me Kryeministrin e vendit Nikolla Gruevski, tha se qeveria dhe partnerët e saj duhet të zgjidhin krizën aktuale duke u bazuar në parimet demokratike dhe Kushtetutën e vendit, ndërsa nënvizoi informacionet rreth korrupsionit të mundshëm të zyrtarëve të saj, ndikimit të qeverisë mbi mediat dhe gjygjësorin, mashtrimet eventuale zgjedhore dhe shkeljet e tjera të pushtetit. /tesheshi.com/
