Ish-kapiteni i Liverpulit, tashmë prej muajsh larg fushave të futbollit, që prej deklarimit të dorëheqjes nga aktiviteti si futbollist, gjendet në Dubai, si pjesë e një fushate reklamuese të kompanisë së njohur të veshjeve sportive Adidas.
Qindra ndjekës të ish-yllit të përfaqësueses angleze kanë shfrytëzuar mundësinë për të marrë autografe prej tij dhe për të bërë fotografi me të në një prej qendrave tregtare.
“E dua Dubain. Eshtë një prej destinacioneve të mia të parapëlqyera. Çdo herë që vij këtu ndeshem me tifozët e Liverpulit, kështu që është fantastike ta çoj një pjesë të kohës me ta,” ka thënë Steven Gerrard.
Ish-lojtari që do të qëndrojë brenda hapësirës së futbollit edhe pse nuk luan më, ka lavdëruar dhe përpjekjet e Katarit për t’u përgatitur për organizimin e Kupës së Botës 2022.
Për të shtuar më tej: “Mendoj se rajoni në tërësi po bën një punë të madhe në rritjen e futbollit. Ju mund të ndjeni pasionin dhe entuziazmin sa herë që vini në rajon.” /tesheshi.com/
