Sekretari i përgjithshëm i NATO-s, Jens Stoltenberg, thotë se Rusia dhe Bjellorusia nuk i kanë respektuar përkushtimet e tyre ndërkombëtare që të jenë plotësisht transparente për ushtrimet ushtarake të planifikuara për muajin e ardhshëm.
Në një intervistë për agjencinë AP, Stoltenberg tha se Rusia po shfryzëton “paqartësitë” në marrëveshje, për ta minimizuar numrin e personelit të NATO-s, të cilët do të jenë vëzhgues në ushtrimet e njohura me emrin “Perëndimi”.
Sipas rregullave të Organizatës për Siguri dhe Bashkëpunim në Evropë (OSBE), të njohura si Dokumenti i Vjenës, shtetet që organizojnë ushtrime ushtarake, me më tepër se 13 mijë ushtarë, duhet të njoftojnë paraprakisht vendet e tjera dhe të jenë të hapura për vëzhgues.
Bjellorusia ka njoftuar se në këto ushtrime do të marrin pjesë, 12700 ushtarë, pra nën kufizimin e paraparë. Por, anëtarët e NATO-s kanë shprehur dyshime se shumë më tepër ushtarë do të marrin pjesë në këto manovra.
“Përderisa në mënyrë rutinore ne thërrasim Rusinë që të vëzhgoj ushtrimet e Aleancës, Rusia asnjëherë nuk ka ftuar asnjë anëtar të NATO-s që të vëzhgojë ndonjë ushtrim të tyre, prej përfundimit të Luftës së Ftohtë”, tha Stoltenberg,
Rusia i ka hedhur poshtë shqetësimet e NATO-s për ushtrimet ushtarake, duke thënë se ato janë të rregullta dhe se “nuk janë agresion, siç konsiderojnë disa vende”. /tesheshi.com/
