Usain Bolt e ka ndarë mendjen që në njëfarë mënyre, do të merret me futbollin profesionist. Jo më kot, sido që t’i ketë punët e angazhimet, ai përfiton për të provuar veten apo për t’u stërvitur pak me futbollin. Më së fundmi, plurikampioni i botës në garat e shpejtësisë, ka marrë pjesë në një seancë stërvitjeje të skuadrës kryesuese të kampionatit të Afrikës së Jugut, Mamelodi Sundowns.
31-vjeçari ka marrë pjesë në stërvitje, madje edhe në ndeshjen “e kontrollit” që kanë zhvilluar lojtarët, duke treguar aftësi të mira në kontrollin e topit, stopimin e pasimin e tij. Madje, xhamajkani që theu çdo rekord botëror në 100 dhe 200 metra, ka shënuar edhe një gol gjatë ndeshjes.
Bolt ishte në Afrikën e Jugut, si pjesë e një turi sponsorizimi që kompania “Puma” që ai përfaqëson, po zhvillon në disa shtete. Angazhimi i 8 herë kampionit Olimpik të vrapimit, nuk është thjesht një show, pasi skuadra kryesuese e Premier League në Afrikën e Jugut, Mamelodi Sundowns, mund t’i bëjë edhe ofertë konkrete xhamajkanit.
Ashtu siç ka deklaruar vetë, Bolt ka pasur edhe oferta të tjera nga klube britanike, por sipas stafit të tij, kjo e skuadrës jug-afrikane, është një ofertë konkrete për të vijuar aktivitetin sportiv në futboll, pas shkëputjes nga atletika, pas turneut të Londrës vitin që shkoi.
Usain Bolt sapo ka nisur të vrapojë pas një dëmtimi në këmbë, e tani pas rekuperimit, ndoshta mund ta shohim sërish të vrapojë në sportin aktiv. Edhe pse “vdiq” që të bëhej lojtar i Manchester United, me të cilin edhe u stërvit ca kohë, Bolt arriti vetëm të ndiqte nga tribuna disa ndeshje të Red Devils, pasi nuk u gjykua se ishte gati për të luajtur në nivele të larta. /tesheshi.com/
