8 nëntor 2016: Stefano Pioli vihet në krye të Interit, i parë si njeriu i duhur për zgjimin e skuadrës që vuan prej nisjes së dekadës.
9 maj 2017: Një deklaratë e përpiluar nxitimthi në orët e vona të mbrëmjes lajmëron shkarkimin e tij.
Vetëm gjashtë muaj në detyrë! I nënti trajner i Interit që nga viti 2010!
Pioli do të zëvendësonte Frank de Boer-in në nëntorin e shkuar, dhe kishte një kontratë që përfundonte në qershorin e 2018-s.
“Interi falënderon Stefanon-n dhe bashkëpunëtorët e tij për përkushtimin dhe punën e madhe të bërë për klubin gjatë gjashtë muajve të fundit të çka ka rezultuar të jetë një sezon i vështirë.”
Me këto fjalë i është treguar dera Pioli-t, shkarkimi i të cilit ishte sidoqoftë i sigurt në fund të sezonit.
Në vend të shtatë në Serinë A, me 13 humbje, me shtatë javë pa fituar, mbushja e kupës për Pioli-n ka qenë humbja ndaj Xhenovës të dielën.
Stefano Pioli pritet të drejtojë Fiorentinën sezonin e ardhshëm, ndërkohë që si kandidatë për vendin e lënë bosh prej tij te Interi shihen Antonio Conte, Diego Simeone dhe Luciano Spalleti.
Trajneri i të rinjve, Stefano Vecchi, do ta drejtoi Interin në tre ndeshjet e fundit të kampionatit. /tesheshi.com/
