Nga Blendi Gashi
Ndërsa legjislatura e pestë e Kuvendit të Kosovës, pra e kaluara është kritikuar tej mase për shterpësi të punëve dhe do mbahet mend si e gazit lotsjellës dhe fjalorit banal të deputetëve, edhe e gjashta që është tani po ecë në binarë të njëjtë.
Nuk shpëtoi pa gaz lotsjellës, ndërsa fyerjet e sharjet vazhdojnë të jenë prezente në çdo seancë, ndërsa për më keq deputetët e zgjedhur po tregojnë se nuk janë të interesuar të kryejnë punën për të cilën janë zgjedhur dhe paguhen nga taksat e qytetarëve.
Se ka një plogështi këtë e dëshmojnë më së miri statistikat e gjashtë muajve të parë, ku legjislatura aktuale është karakterizuar me shumë pak ligje të miratuara, mungesë kuorumi, mos-pjesëmarrje në votim e deputetëve e shpeshherë edhe me gjuhë e veprime joparlamentare.
Sipas të dhënave të Institutit Demokratik të Kosovës (KDI), organizatë kjo që mbikëqyrë punën e institucionit ligjvënës në gjashtë muajt e parë kjo legjislaturë ka mbajtur gjithsej 24 seanca, prej të cilave 15 seanca plenare, 6 të jashtëzakonshme dhe 3 seanca solemne dhe janë thirrur 4 interpelanca, të gjitha për kryeministrin Ramush Haradinaj
Në 20 raste seancat plenare janë vazhduar në ditë të tjera, jashtë ditës kur kanë qenë të parapara të mbahen.
Në këto seaca janë miratuar 9 ligje, 5 në 2017 dhe 4 në 2018, ku 5 prej tyre kanë karakter financiar, kurse 42 ligje janë në procedurë të shqyrtimit aktualisht nga Komisionet Parlamentare;
Janë realizuar gjithsej 191 mbledhje të Komisioneve Parlamentare, më së shumti në muajin tetor 2017 (43 mbledhje)
Komisionet me më së shumti mbledhje të organizuara janë: Komisioni për Zhvillim Ekonomik (20), Komisioni për Legjislacion (18) dhe Komisioni për Buxhet dhe Financa (17). Më së paku takime kanë realizuar Komisioni për Mbikëqyrjen e AKI-së (7), Komisioni për Bujqësi (10) dhe Komisioni për të Drejtat e Komuniteteve dhe Kthim (11).
Në 29 raste ka pasur raportim nga Kabineti Qeveritar (ministrat) para Komisioneve Parlamentare. Katër Komisione Parlamentare nuk kanë pasur në raportim asnjë ministër;
Janë realizuar 126 pyetje parlamentare, më së shumti nga Grupi Parlamentar i Vetëvendosjes (56), pastaj LDK (34), PDK (19), AAK (8), Nisma (4) dhe Lista Serbe (1).
Kujtojmë periudha e parë legjislative dhe ajo e dytë deri në vitin 2006 udhëhiqej nga Nexhat Daci, ndërsa Kolë Berisha udhëhoqi periudhën e dytë legjislative 27.03.2006 – 12.12.2007, në periudhën e tretë legjislative 13.12.2007 – 03.11.2010 kryekuvendar ishte Jakup Krasniqi, i cili udhëhoqi dhe periudhën e katërt deri më 2014, e pesta dhe e gjashta nga Kadri Veseli. /tesheshi.com/
