E përditshmja turke Yeni Şafak u referohet statistikave të publikuara nga Departamenti i Çështjeve Fetare (Diyanet), duke bërë të ditur se në vend janë ndërtuar rreth 9.000 xhami nga viti 2005 në 2015-tën.
Turqia ka patur 75.941 xhami në kohën e ardhjes në pushtet të Partisë për Drejtësi dhe Zhvillim (AKP), në vitin 2002.
Numri i tyre sot ka arritur në 84.684. Stambolli është qyteti që ka numrin më të madh të xhamive, 3.317 të tilla, ndërsa, sipas raportit të Diyanet-it, në Tunxheli ka vetëm 92 xhami, duke qenë qyteti me numrin më të vogël të tyre.
Një prej xhamive të ndërtuara gjatë kësaj kohe është ajo në Çamllëxha të Stambollit, në kodrën më të lartë të Yskydarit, e që mund të shihet nga çdo pjesë e qytetit. Ajo mund të presë 50.000 besimtarë, dhe është xhamia e tretë me gjashtë minare në Turqi, pas asaj të Sulltanahmetit dhe xhamisë Sabanxhë në Adana.
Mbi 100 xhami janë ndërtuar në 25 vende, veçanërisht në Ballkan, por dhe në Kaukaz e në Azinë Qendrore.
Shpejt do t’i hapin dyert në dhjetë vende 16 xhami të reja, që janë ende në ndërtim, si në Shqipëri, në Xhibuti, në Britani e Palestinë. /tesheshi.com/
