Dy pilotët e Mercedes-it kanë marrë paralajmërimin e fundit nga drejtuesit e skuadrës së tyre ditë më parë, e çdo incident tjetër do shoqërohet me penalizim për ta, por kjo nuk ka për t’i penguar nesër t’i japin sërish jetë rivalitetit aty ku e lanë një javë më parë.
Lewis Hamilton do të niset nesër i pari në pistën e Silverstone-it, në garën e shtëpisë së tij. Mes mbështetësve të britanikut ka patur sot pankarta ku ironizohej Rosberg për atë përplasje në Austri, veçse kjo paralajmëron një tjetër stuhi mes dy kundërshtarëve.
Hamilton ia ka dalë në fund të provave të sotme zyrtare që të zërë vendin e parë, duke e lënë pas Rosberg-un, që do të niset i dyti.
Paraqitja e të dy pilotëve ka qenë e shkëlqyer, edhe pse tensioni ishte lehtësisht i dallueshëm.
Në garën e dhjetë sezonale në F1, i treti në nisje do të jetë holandezi i Red Bull-it, Max Verstappen, i ndjekur nga shoku i skuadrës, Daniel Ricciardo.
Të pasuar kanë qenë këta pilotë nga dyshja e Ferrari-t, Raikkonen e Vettel, por ky i fundit do të niset nga vendi i 11-të, pas një penalizimi për ndërhyrje në kutinë e marsheve.
Kampionatin e Formula 1-shit e kryeson Rosberg, me 11 pikë më tepër se Hamilton.
Gara e nesërme meriton vëmendje, pasi i plotëson të gjitha kushtet për të qenë një e tillë spektakolare. /tesheshi.com/
