Që nga e shtuna, lidhësi USB-C u bë zyrtarisht standardi i zakonshëm për karikimin e pajisjeve elektronike në Bashkimin Evropian, njoftoi Komisioni Evropian në platformën sociale X.
“Kjo do të thotë teknologji më e mirë karikimi, reduktim i mbetjeve elektronike dhe më pak vështirësi në gjetjen e karikuesve që ju nevojiten”, shkruan Komisioni.
Direktiva, e cila synon të zvogëlojë sasinë e mbetjeve elektronike në Union dhe t’u mundësojë konsumatorëve të blejnë pajisje elektronike më të qëndrueshme, u miratua nga eurodeputetët në seancën plenare në Strasburg në vitin 2022 me 602 vota pro, 13 kundër dhe tetë abstenime.
Standardi i ri për pajisjet portative do të jetë USB-C, i cili mundëson karikimin e shpejtë dhe transferimin e të dhënave, dhe konsumatorët do të mund të zgjedhin nëse duan të blejnë një karikues të ri së bashku me pajisjen e re.
Prodhuesit e kompjuterëve notebook do të duhet të respektojnë të njëjtat rregulla nga 28 prilli 2026, shkruan Euroneës.
“Blerja e panevojshme e një karikuesi çdo vit”
Anna Cavazzini, kreu i komitetit të tregut të brendshëm dhe mbrojtjes së konsumatorit të Parlamentit Evropian, tha në një deklaratë se ishte një “hap vendimtar drejt komoditetit për konsumatorët dhe përgjegjësisë ndaj mjedisit”.
“Këto rregulla kanë të bëjnë me frenimin e tonëve të mbeturinave të krijuara nga asgjësimi i karikuesve çdo vit dhe do të kursejnë pothuajse 250 milionë euro për familjet në Bashkimin Evropian duke eliminuar blerjet e panevojshme të karikuesve çdo vit”, shtoi Cavazzini.
Parlamenti Evropian ka njoftuar se do të “monitorojë nga afër” përshtatjen e prodhuesve ndaj ndryshimit të rregullores.
Prodhuesit e pajisjeve elektronike i kanë rezistuar prej kohësh presionit të BE-së për të standardizuar teknologjitë e karikimit.
Vendimi do të zbatohet për të gjithë prodhuesit, kryesisht Apple, i cili kundërshtoi rregullat e reja, duke përmendur shqetësimet rreth inovacionit.
Megjithatë, gjigantët e teknologjisë kanë filluar të respektojnë direktivën dhe të përdorin USB-C në pajisjet e tyre. /tesheshi.com/
