Dy ministra të qeverisë turke nuk arritën t’i zhvillojnë takimet e tyre në fundjavë me bashkatdhetarët në Holandë. Ministrit të Jashtëm iu anulua leja e fluturimit, kurse ministrja për Familjen dhe Politikat Sociale u nxor forcërisht jashtë kufirit holandez.
Sjellja në veçanti ndaj ministres në fjalë ishte e patolerueshme. Ajo, pavarësisht imunitetit diplomatik dhe ligjeve ndërkombëtare, nuk u la për orë të tëra të futej në konsullatën turke në Roterdam, për t’u shpallur e padëshiruar më pas e për t’u nxjerrë me polici nga vendi.
“Nuk japim leje për politikanë të vendeve të tjera që të vijnë të bëjnë politikë në vendin tonë,” deklaronte përmes rrjeteve sociale kryeministri holandez Mark Rutte.
E vërteta është krejt ndryshe nga ajo që kërkon të servirë shefi i qeverisë holandeze. Bëhet fjalë jo për qëndrim asnjanës, por për ndërhyrje të drejtpërdrejtë në fushatën për referendumin në Turqi, duke u penguar tubimet qeveritarëve turq dhe duke u dhënë hapësirë pa fund kundërshtarëve të ndryshimeve kushtetuese.
Ministrat e qeverisë turke u penguan nga tubimet, por nuk ka ndodhur kështu me përfaqësues të fushatës për “jo”-në.
Siç bën të ditur e përditshmja turke Sabah, një ish-deputet i AKP-së, një ish-kryeministër në qeveritë e Erdoğan-it vite më parë, Abdüllatif Şener, është lejuar në fillim të marsit të mbajë fjalime kundër referendumit dhe ndryshimeve kushtetuese në tre qytete të Holandës. Veprimtaria e tij në kuadër të “jo”-së ka zënë vend të gjerë dhe në shtypin holandez.
Një tjetër përfaqësues i “jo”-së, Metin Feyzioğlu, kryetari i Unionit të Shoqatave Turke tğ Avokatëve, është lejuar të bëjë tubim pikërisht në Roterdam, e pos kësaj, aktiviteti i tij është transmetuar në televizionin shtetëror holandez!
Tuğba Hezer Öztürk, një deputete e partisë kurde HDP, është lejuar të mbajë tubime në Holandë edhe pse për të ka një urdhër ndalimi në Turqi. /tesheshi.com/
