Një vendim i habitshëm i gjykatave gjermane i preu rrugën një fjalimi të Erdoganit nëpërmjet ekranit për manifestuesit në Këln që do të protestonin sot në mesditë kundër puçit ushtarak të 15 korrikut në Turqi.
Ky vendim u cilësua i motivuar politikisht nga organizatorët e manifestimit, edhe pse policia gjermane do ta përligjte atë me “arsye sigurie”. Po ashtu vendimi u quajt i papranueshëm nga pikëpamja ligjore.
Por nuk ka ngjarë po njëlloj pesë vite të shkuara, kur udhëheqësi i PKK-së, organizatës terroriste kurde, do t’u drejtohej mbështetësve të tij nëpërmjet një videokonference.
Murat Karajëllani e drejton PPK-në që prej arrestimit të Abdullah Oçalanit në vitin 1999. Atij do t’i mundësohej një videokonferencë në vitin 2011, në Festivalin e 19-të Kulturor Kurd në Këln.
Askush nga autoritetet gjermane nuk u kujtua asokohe ta pengonte fjalën e tij, qoftë policia, gjykatat apo diçka tjetër.
Zëdhënësi i presidentit turk, Ibrahim Kallën, do ta kritikonte sot vendimin e gjykatave gjermane nëpërmjet një deklarate të shkruar, ku thuhej: “Masa sigurie duhet të merren kundër provokatorëve antidemokratikë, e jo kundër njerëzve që zhvillojnë manifestime demokratike.”
Qortues do të ishte dhe ministri turk për Çështjet e BE-së, Omer Çelik.
“Vendimi i Gjykatës Kushtetuese gjermane mbi manifestimin kundër puçit në Këln është një shkarje e plotë nga liria e fjalës dhe demokracia,” shkroi ai në Twitter. /tesheshi.com/
