Metropoli turk është nën ethet e mitingut mbase më gjigand të viteve të fundit. Pesë milionë njerëz priten të jenë sot të pranishëm në Jenikapë, aty ku pasdite, në 17:00 me orën lokale, do të nisë “Mitingu i demokracisë dhe dëshmorëve”.
Ky miting do t’u kushtohet të rënëve në mbrojtje të rendit kushtetues gjatë përpjekjes së dështuar për grusht shteti mes 15 dhe 16 korrikut. Me të do të mbyllet dhe qëndrimi thuajse trejavor i qytetarëve turq gjatë mbrëmjes në tërë rrugët e sheshet e vendit, i nisur me thirrjen e presidentit Erdogan natën e 15 korrikut.
Në miting do të marrin pjesë krerët më të lartë të shtetit turk, presidenti, kryeministri, kryetari i parlamentit, si dhe udhëheqësit e dy partive kryesore opozitare.
Aktiviteti madhështor do të transmetohet drejtpërdrejt në shtatë gjuhë, në turqisht, anglisht, frëngjisht, spanjisht, gjermanisht, rusisht dhe arabisht.
Një personel prej 13.000 personash, veç punonjësve të policisë, do të punojnë për mbarëvajtjen e mitingut. Helikopterë, ambulanca, e një personel mjekësor prej 700 personash do të jenë të gatshëm të ofrojnë ndihmën e parë për çdo nevojë. Transporti do të jetë falas gjatë gjithë ditës.
Një skenë e madhe është bërë gati, së bashku me ekrane e sisteme zëri gjigande. 1.5 milionë kapele, 2.5 milionë flamuj turq, e pesë milionë shishe uji do të jenë gati për pjesëmarrësit në miting. Ata do të kalojnë nëpër 165 dyer me detektorë metalikë.
Veç pjesëmarrjes së jashtëzakonshme, veçoria më dalluese e mitingut të sotëm në Stamboll është prania e kryetarëve të dy partive kryesore opozitare, republikanëve të CHP-së dhe nacionalistëve të MHP-së.
Mitingje të ngjashme do të mbahen njëkohësisht në të gjithë Turqinë. /tesheshi.com/
