Stafi i “Jugohromit” në Maqedoni ka vendosur t’i kthehet punës, me justifikimin se mbyllja e fabrikës nuk po e pastron ajrin mbi Pollog. Nga njëra anë, është popullata që ankohet për tymrat e Jugo-s, e nga ana tjetër janë punëtorët ata që qahen se po mbeten pa punë.
Përfaqësuesit e Sindikatës së atyshme kërkojnë nga qeveria rihapjen e fabrikës, të mbyllur tashmë që nga nëntori.
Vendimi për fikjen e furrave erdhi nga Ministria e Mbrojtjes së Ambientit e cila potencoi se kompania që e aministron Jugo-n i ka kaluar afatet për vendosje të sistemit të filtrave.
Prej atëherë, disa herë të punësuarit kanë protestuar me qëllim që fabrika t’i rindezë furrat, e ndërkaq ata të kthehen në punë.
Sipas drejtorit gjeneral të “Jugohromit”, Vasil Skenderovski, vendimi i Inspektoratit Shtetëror për ta mbyllur kompaninë është tendencioz.
Nga fabrika treguan se në bazë të të dhënave zyrtare, ndotja ende është mjaft e lartë, edhe pse kombinati nuk punon, gjë që për to është dëshmi se nuk është “Jugohromi” ndotësi kryesor. /tesheshi.com/
