Reportazh nga
Musa Mustafa
E pa besueshme por e vërtet, Stacioni hekurudhor në Mitrovicë, shërben vetëm për tu fotografuar për kuriozitet, pasi që në këtë stacion që nga viti 2008 nuk ka qarkulluar asnjë tren.
Stacioni hekurudhorë në Mitrovicë, dikur ishte një qendër ku udhëtarët “mësynin” jo vetëm qytetet e shtetit që më nuk ekziston Jugosllavisë, por edhe Evropën për të udhëtuar me Tren, ndërsa tani ai qëndron i heshtur.
Vetëm ndonjë kalimtar i rastit apo nxënës që shkurtonin rrugën për të shkuar në qendër të Mitrovicës apo në shkollë, ‘prishnin’ heshtjen e këtij stacioni.
Pastërtia në maksimum, trarë të binarëve të dëmtuar, ndërsa që vetë binarët ishin të ndryshkur në sipërfaqen e sipërme, gjë që të bënte me dije se këtu ka kohë që nuk ka kaluar asnjë tren.
Në një zyre të këtij stacioni, qëndronin të heshtur dy punëtorë të hekurudhës së Kosovës që po lexonin një gazetë dhe po shikonin televizor.
“Urdhëroni me ddfarë mundemi t’ju ndihmojmë”, ishte përgjigjja e punëtorëve të hekurudhës, që disi mbeten të habitur me ‘vizitën’ që ju bëmë, pasi që kishte vite që njeri nuk kishte shkelur në pragun e asaj zyre.
“Kemi mbetur shumë keq këtu në Stacionin hekurudhorë të Mitrovicës, nuk ndihemi mirë pasi që tërë kohën që jemi në punë nuk kemi kontakt me asnjë njeri”, ka thënë për portalin ‘Tesheshi’, përgjegjësi i këtij stacioni dhe drejtuesi i Trenave, Ymer Sallahu.
“Për herë të fundit Trenin për në Zveçan e kam përcjellë më 3 mars të vitit 2008 në orën 08:16 dhe më pas është kthyer për në Fushë Kosovë” ka evokuar kujtimet Sallahu.
“Si drejtues të trenave kemi përcjell vetëm ata që kanë ardhur për të marrë apo për të sjellë makineri apo teknikë të KFOR-it, këto shërbime i kemi kryer gjatë këtyre viteve që pas shpalljes së Pavarësisë së Kosovës”, thotë drejtuesi i trenave.
Ndërsa për vitin 2015, këtu nuk ka lëvizur asnjë tren me përjashtim të disa makinerive të hekurudhës që vijnë për të kontrolluar gjendjen e binarëve, trarëve dhe instalimeve e shenjave të hekurudhës.
“Në hekurudhë jam i punësuar që nga viti 1972, në atë kohë në këtë stacion brenda ditës kemi përcjellë mbi 30 trena të udhëtarëve dhe mallrave në ditë, e në mesin e tyre ka pasur edhe trena ndërkombëtar si ‘Akropolisi’ që qarkullonte nga Athina e Greqisë për në Munchen të Gjermanisë. Mërzitemi këtu duke qëndruar të vetëm pa udhëtarë, pra nuk i shërbejmë udhëtarëve, por ne jemi këtu për të mbikëqyrur gjendjen e stacionit si dhe instalimet e sinjalizimit të hekurudhës.
Gjithashtu angazhohemi që t’i mirëmbajmë edhe 19 kabllot lëvizëse të binarëve që shërbejnë për qarkullimin e trenave, ato gjithnjë duhet të jenë në funksion pasi që çdo ditë presim ndonjë lajm se do të fillojë qarkullimi i trenave edhe në Mitrovicë”, thotë Sallahu.
Në këtë stacion janë të punësuar 4 punëtorë për momentin të cilët shërbejnë 24 orë në ditë. Por pasi që qarkullim të trenave nuk ka, ata bëjnë edhe pastrimin e objektit dhe binarëve që të mos lënë ndonjë letër apo qese plasmasi. ‘Nuk ka kuptim që këtu të ketë bërllok në stacion”, thotë ai.
“Kemi raste kur ndonjë njeri i huaj, vjen në stacionin hekurudhor në Mitrovicë dhe kërkon shërbim. Pyetja e tyre është kur do të vije treni për në Prishtinë, apo kur ka tren për Beograd, por ne me keqardhje iu tregojmë se treni në këtë stacion nuk qarkullon fare, por ju duhet të drejtohen autobusëve apo taksi.
Ndërkombëtarët mbeten të habitur, ka shumë prej tyre që për kuriozitet pas marrjes së njoftimit se këndej nuk qarkullon asnjë tren, bëjnë selfie dhe ikin nga këtu, thotë Sallahu.
Bota për transport të mallrave dhe udhëtarëve shfrytëzon kryesishttrenat, pasi që edhe janë më të lirë, por tek ne është ndryshe thotë ai.
/tesheshi.com/
