Lista Serbe ja ka humbur përfundimisht shpresat kryeministrit Haradinaj e kryeparlamentarit Veseli se deputetët e saj mund ta votojnë marrëveshjen për Demarkacionin me Malin e Zi, me ç’rast ju kanë bërë thirrje të kërkojnë vota diku tjetër.
Kjo parti, përmes një komunikate për media, ka bërë të ditur se tema për Demarkacionin për ta nuk ekziston dhe me këtë duhet të merren partitë shqiptare në bazë të programit të tyre politik.
“Kjo çështje nuk na intereson, ndërsa me të le të merren partitë shqiptare në kuadër të programit të tyre politik”, thuhet në komunikatë.
Lista Serbe më tej thotë se nuk dëshiron ta shantazhojë, mirëpo as nuk do të lejojë të shantazhohet, prandaj kërkon nga partnerët e koalicionit raport korrekt, si dhe respektimin e marrëveshjeve politike të cilat janë bazë për funksionimin e koalicionit në pushtet.
“Ne nuk duam të jemi të instrumentalizuar në asnjë mënyrë, dhe as që kemi qëllim të devijojmë nga parimet tona politike, në bazë të të cilave është formuar kjo parti, si garancë e të drejtave të popullit serb në Kosovë”, thuhet në komunikatë.
Pas këtij deklarimi të sërishëm të “Srpska”-s, koalicioni qeverisës i mbetet të shpresojë që deputet të caktuar të Lëvizjes Vetëvendosje të japin votën pro, në të kundërtën ratifikimi i Demarkacionit vështirë se do ratifikohet as javën tjetër sic kanë parlajmëruar krerët e shtetit. /tesheshi.com/
