Ministri i Rendit Sandër Lleshaj doli në një konferencë për shtyp një ditë pas grabitjes së bujshme për të dytën herë në Rinas, ku u rrëmbyen miliona euro.
Siç dhe kolegia e tij Balluku, Lleshaj e ka adresuar përgjegjësinë e asaj që ka ndodhur te konçensionari dhe kontraktori i zgjedhur nga kompania kineze për sigurinë e aeroportit, duke thënë se kanë dështuar.
“Nuk janë përmbushur përgjegjësitë e kompanisë kineze të aeroportit. Kompania kineze dështoi. Konçesionari dhe kontraktori i zgjedhur prej saj nuk zbatuan standardet e detyrueshme që përcaktohen nga legjislacioni me gjithë se kanë arkëtuar 3 euro për çdo pasagjer që ka dalë nga ky aeroport.
Do të kishte mjaftuar kjo sasi për të garantuar perimetrin e jashtëm, që është hapur dhe për më keq, konçesionari nuk ka arritur që të sinjalizojë policinë. Konçesionari jo vetëm që ka refuzuar kërkesat e policisë për marrjen e masave, por në shumë raste nuk ka kthyer edhe përgjigje për korrespodencën zyrtare. Nisur nga incidenti dhe marrëdhëniet e vështira me konçesionarin, Shqipëria do të marrë masa ligjore të forta për të garantuar të gjitha standardet në Rinas”, tha ministri Lleshaj.
Ndërsa sa i përket autorëve, kreu i Rendit premtoi kapjen e tyre.
“Sa i përket dinamikës, dua të them se autorët kanë lënë në dorë të hetimit prova të shumta. Falë reagimit të shpejtë, banda që besohet se edhe më parë ka goditur vlerat monetare në Rinas, pas humbjes së djeshme të një anëtari të saj ka marrë një goditje shkatërruese. Shkatërrimi i këtij grupi është një tjetër sinjal ndaj botës së krimit”, theksoi Lleshaj. /tesheshi.com/
