Portali i Kremlinit Sputnik bën të ditur se arsyeja reale e tërheqjes së stafit diplomatik serb nga Shkupi është vetëm Kosova.
Sputnik thotë se ka siguruar një material të qeverisë së Zoran Zaevit, në të cilin bëhet e ditur se Maqedonia do të pranojë hyrjen e Kosovës në UNESCO.
Presidenti serb, Aleksandër Vuçiç deklaroi mbrëmë se çështja do të sqarohet brenda 10 ditëve dhe bëri thirrje për të lënë spekulimet.
Të njëjtën gjë pak a shumë e elaboroi edhe kryeministrja Ana Brnabiç,
Por zv.kryeministri serb, Ivica Daçiç, i cili njihet si “dora e Moskës”, deklaroi se Beogradi do të hakmerret ndaj Shkupit, duke mos e njohur me emrin Maqedoni, por ish-Republika Jugosllave e Maqedonisë.
Ministria e Jashtme serbe tërhoqi dje të gjithë stafin e ambasadës në Beograd, duke lënë vetëm ambasadoren Dusanka Divjak-Tomiç.
Vetëm disa muaj më parë, qeveria e Maqedonisë dëboi dy diplomat serbë në Shkup, njëri prej të cilëve ishte kapur natën e 17 prillit kur u masakrua Zoran Zaev, duke komplotuar me grupin e huliganëve.
Beogradi, si pretekst për largimin e diplomatëve ka përcaktuar “mungesën e sigurisë së punonjësve të ambasadës dhe familjarëve të tyre”.
Ministria e Jashtme serbe i bëri thirrje qeverisë së Maqedonisë që të zbatojë konventën e Vjenës për sigurinë e punonjësve diplomatikë.
Ndërkaq, kreu i partisë serbe në Maqedoni, Ivan Stoilkoviç, aleat politik i Nikolla Gruevskit, në një intervistë për Sputnik, e akuzoi Zoran Zaevin se “po e trajton Serbinë siç SHBA trajton Iranin”.
Stoilkoviç e akuzoi Zaevin për paburrëri, pasi në fillim tha se nuk do ta votonte hyrjen e Kosovës në UNESCO dhe më pas ndryshoi mendim.
“Maqedonia është kthyer drejt aksit Tiranë-Shkup-Sofje. Ka deklarata se Bullgaria do të shtrihet nga Vardari në Detin e Zi. Nga ana tjetër po shohim se po zbatohet platforma e Tiranës. Me një fjalë, kush e do e kush po e përfiton Maqedoninë. Si serbët asnjë nuk e do pa interes këtë popull”, tha kryetari i Partisë Demokratike serbe, i cili shtoi se ai së bashku me VRMO-në do të bëjnë çmos të ndalin aksionin politik të Zoran Zaevit dhe shqiptarëve.
Përgatiti: Ylli Pata – /tesheshi.com/
