Zbulohet plani i qarqeve serbe dhe ruse për të stisur një konflikt në Kosovë që të pengojnë avancimin e shtetit në OKB dhe të krijojnë një alibi për të arritur ndarjen e saj.
Portali i Kremlinit, Sputnik, i cili shpesh hedh teza që më pas bëhen fakt i kryer, ka publikuar një shkrim të gjatë ku thekson se “janë parashikuar sulme të ish-strukturave të UÇK-së në enklavat serbe në Kosovë”. Brankica Ristiç, e përhershmja e shkrimeve për shqiptarët, i referohet gjeneralit Momir Stojanoviç, ish- komandant operativ i trupave serbe në komandën e Prishtinën.
Gjenerali Stojanoviç, deklaron për Sputnik se “pas marrëveshjes së Kumanovës kur u vendos çarmatimi i Ushtrisë Çlirimtare të Kosovës, shumica e arsenalit luftarak serb u fshehën dhe ato u përdorën në vitin 2004 kundër fshatrave serbe.
Sipas të gjitha gjasave ata do të ndodhë sërish i njëjti skenar”, thotë Stojanoviç për Sputnik.
Por ironia e referencës së qarqeve serbo-ruse është mjaft e rëndë. Ish-komandanti i Prishtinës, është një ushtarak i akuzuar për dhunë e krime ndaj popullsisë civile dhe sipas të gjitha gjasave duhet të ishte të paktën i akuzuar si nga drejtësia serbe por edhe ajo ndërkombëtare, për krimet që ka kryer armata serbe në Kosovë.
Por ai sot merret si një analist i pavarur…
Duket se po riciklohet një skenar që është përdorur në Kosovë, pikërisht kur nisi dhe vala e parë e arrestimeve të krerëve të UÇK-së, e kur në krye të Prokurorisë së Hagës ishte Carla del Ponte dhe kryeministër ishte sërish Ramush Haradinaj, i cili u akuzua për Krime Lufte. Sot sërish kryeministër është Ramush Haradinaj, i dalë i pafajshëm nga Gjykata e Hagës, por që rrezikohet vëllai i tij dhe shumë ish-krerë të UÇK-së nga Gjykata Speciale.
Në vitin 2004 u inskenua një valë dhune në enklavat serbe, duke prishur edhe objekte religjoze të cilat asnjëherë nuk u hetuan nga ndërkombëtarët. Në atë kohë Kosova nuk kishte institucione si sot, pasi ajo drejtohej nga UNMIK-u pra OKB-ja. President i Kosovës ishte Ibrahim Rugova dhe kryeministër Ramush Haradinaj. Por qeveria e Kosovës nuk kishte mundësi as të shpërndante rrogat e punonjësve.
Sputnik thekson më tej në shkrimin e tij se paralajmërimi i bërë nga Daut Haradinaj për “rikthimin e UÇK”-së, nuk është tjetër veçse një shembull i qartë se trazirat do të përsëriten. Gjenerali Stojanoviç, ish-komandanti i ushtrisë serbe në Kosovë, deklaron për portalin e Kremlinit se ka gjasa që këto trazira të kontrollohen së largu nga ndërkombëtarët.
“Krerët e UÇK-së kanë vizituar selinë e NATO-s që në vitet 1997-1998, kur quheshin ende terroristë.
Perëndimi kontrollon gjitçka në Kosovë, ai e bëri të pavarur dhe këtë herë, ai do ta lërë situatën të shpërthejë deri në një farë kufiri, pastaj do të ndërhyjë. I dinë mirë limitet ata”, thekson gjenerali serb, i cili parashikon një konflikt të përmasave të mëdha.
“Nëse dikush e ka zgjidhur krizën duke lënë pika të shumta të nxehta të pambyllura në një hapësirë aq të vogël sa e jona, duket e ka bërë me qëllim.
Kjo mund të thotë se rreziku më i vogël mund të përshkallëzohet në një luftë të re. Kam përshtypjen se dikush me qëllim ka lënë kaq shumë çështje të pazgjidhura që ai gjithmonë mund të luajë në hartë për t’u dukur për të qetësuar situatën e komplikuar, thekson Stojanoviç.
Brankica Ristiç e Sputnik, vijon më tej në analizën e saj, duke theksuar se SHBA do të “djegë” Ballkanin pikërisht për të mos lejuar influencën ruse në rajon. Nga Begradi ka një javë që i fryhet konfliktit, por mjafton të përdoresh një logjikë të thjeshtë për të analizuar se kujt i prish punë dhe kujt i vyën përplasja. Konflikti i armatosur apo çdo incident i rëndë nuk i intereson aspak Kosovës, pasi do të ndalonte proceset e saj drejt njohjes si shtet, pranimit në OKB, por edhe ngritjes së ushtrisë, si dhe konsolidimit të institucioneve.
Një konflikt mund të shkaktojë një krizë të rëndë politike dhe institucionale, ku edhe kthimi në zgjedhje s’do të zgjidhte punë pasi sërish vendi do të ishte i mbingarkuar dhe i polarizuar, pra i paqeverisshëm. Kurse Serbisë, një konflikt, edhe pse mund të përdoreshin serbët e Kosovës si “mish për top” do t’i krijonte epërsi.
Beogradi do të ndërpriste dialogu dhe do të kërkonte një përfshirje të Rusisë në një negocim të nivelit të lartë për zgjidhjen e krizës. Në fund, do të kërkohej ndarja e Kosovës, ku hartat, si edhe në Konferencën e Londrës në vitin 1913 kur u copëtua Shqipëria, apo edhe në Dayton për Bosnjën në vitin 1995, do të punohej si në një lloj “rulete ruse”, pra hiq një qytet e shton një fshat.
Çdo tension është jashtë interesave të Kosovës, e cila duhet të vërtetojë se është shtet që kontribuon për stabilitet dhe paqe. Qoftë edhe nëse sakrifikohen disa politikanë.
Ylli Pata – /tesheshi.com/
