Rusia ka nisur një betejë tjetër frontale në Maqedoni kundër shqiptarëve, duke i dërguar presidentit të Maqedonisë, Gjeorgje Ivanov, një mesazh që të mos dekretojë ligjin për përdorimin e gjuhës shqipe në administratën shtetërore.
Gjithnjë duke përdorur një komentatore tashmë të njohur për retorikën antishqiptare, Brankica Ristiç, portali i Kremlinit Sputnik, ka shkruar një pamflet të gjatë, ku sulmon fort Edi Ramën, Zoran Zaev, natyrisht partitë shqiptare dhe deklaron se burime të forta në presidencë kanë bërë të ditur se Presidenti Gjeorgje Ivanov do ta rrëzojë ligjin për dy-gjuhësinë.
Sipas Sputnik “Zoran Zaev u përgjërua se nuk do të ketë Platformë të Tiranës apo diçka të ngjashme, por sapo është depozituar në Parlament një ligj për përdorimin e gjuhës shqipe, duke e kthyer atë në zyrtare.
Por tashmë është e qartë se Zaev i ka marrë urdhërat nga Edi Rama, gjatë takimit të tyre në Trieste. Takim që ishte shumë miqësor dhe u vu re e gjithë loja që solli Zaevin në një njeri pro shqiptar.
Platforma e Tiranës u hartua dhe u firmos në zyrën e Edi Ramës në selinë e kryeministrit shqiptar. Këtë maskaradë vetëm presidenti Gjeorgje Ivanov munda ndalë”, shkruan Sputnik.
Portali rus shton më tej se “që Platforma e Tiranës nuk është një fantashkencë këtë e vërteton edhe procedura e shqyrtimit të ligjit mbi gjuhën shqipe, që është dërguar me procedurë të shpejtuar”.
Por ka edhe më, Sputnik shkon edhe më larg, duke frikësuar maqedonasit se shqiptarët do të ndryshojnë stemën e Republikës, himnin kombëtar edhe flamurin.
Gjë që në fakt nuk e shpreh ligji për gjuhësinë në asnjë vend.
Por kryetari i Partisë Demokratike të Serbëve në Maqedoni, një aleat i Nikolla Gruevskit, Ivan Stolikoviç, deklaron për Sputnik se ligji penalizon pakicat e tjera kombëtare, duke i hedhur benzinë një zjarri që pritet të shpërthejë së shpejti.
Serbët dhe romët, pritet që të zhvillojnë një protestë dhe aksion politik që të kërkojnë që edhe ata të përfshihen në shtratin shtetformues të Maqedonisë.
Aksion që mund të destabilizojë situatën në vend dhe të vërë në vështirësi qeverinë e Zoran Zaevit.
“Të gjithë ata që kanë thënë se Platforma e Tiranës nuk ekziston dhe ka thënë se është një trillim i disa të ashtuquajturave të prapambeturve në Maqedoni, Serbi dhe në të gjithë Ballkanin, tani duhet të ndalen. Ata përjetuan humbjen. Ky ligj praktikisht e vendos gjuhën shqipe në të njëjtin nivel me maqedonishten, Maqedonia bëhet një shtet dygjuhësor”, tha Ivan Stolikoviç për Sputnik.
Kreu i partisë serbe thekson se nëse që ulet frika në shoqërinë maqedonase duhet që përveç shqipes të gjithë gjuhët e tjera të pakicave si serbishtja, gjuha ture dhe ajo rome të bëhen zyrtare.
Por Sputnik i kërkon hapur që të rikthehet në skenë Ivanov, i cili para vetëm dy muajsh u thirr në Kremlin nga Vladimir Putin.
Portali rus thekson se për ta rihartuar nga e para ligjin duhet të hyjë në lojë presidenti Ivanov. /tesheshi.com/
