Tirana dhe Prishtina janë bërë së bashku në një aksion politik të papracedentë.
Portali rus Sputnik, bën të ditur se Shqipëria do të depozitojë një akuzë zyrtare ndaj Serbisë për gjenocid.
Akuzën zyrtarisht do ta formulojë Prishtina zyrtare, por do të jetë Shqipëria e cila do ta dorëzojë në Hagë meqë është anëtare e OKB-së.
Sipas Sputnik, vizita e fundit në Kosovë e William Walker-it, ish-kreu i Misionit Verifikues, nuk ishte aksidentale.
Ai dëshmoi në lidhje me vrasjen masive të civilëve shqiptarë nga ana e ushtrisë serbe dhe policisë, si dhe qytetarëve serbë të Kosovës. Por Prishtina nuk mund ta padisë Serbinë për shkak se ajo nuk është anëtare e OKB-së.
Lista me emrat e 57 serbëve që dyshohet se kanë kryer krime lufte në Kosovë kundër civilëve shqiptarë në Gjakovë, Raçak, Drenicë, dhe për të cilat Prokuroria Speciale e Kosovës ka lëshuar urdhëra për arrestimin, është pjesë e një plani më të gjerë, ku Hashim Thaçi nuk ka hequr dorë nga ideja që Serbia duhet paditur për gjenocid.
Sputnik thekson se kjo është maja e ajsbergut, pasi aktorët kryesorë kundër të cilit Prishtina ka përgatitur padi, janë gjeneralë, oficerë dhe komandantë të ushtrisë serbe që kanë qenë në krye të operacioneve gjatë luftës në Kosovë.
Prishtina ka për qëllim të ngrejë padi për përgjegjësinë e komandës në Beograd. Kjo sipas një precedenti të mëparshëm, me vendimet e Hagës dhënë ndaj serbëve për rastin e gjenocidit në Bosnjë.
Burimi i Sputnik thotë se Prishtina ka angazhuar një ekip ekspertësh ligjorë dhe se Gjykata Speciale për krime të kryera në Kosovë do të përdoret si një “trampolinë” për qëllimet e tyre.
Nëse do ndodhë kjo që shkruan Sputnik, do jetë i dyti rast ku Tirana do ketë rolin e saj përcaktues në një zhvillim rajonal. Kujtojmë se politika maqedonase, është ende në ngërç nga një vendim i marrë në Tiranë, ku pala shqiptare u bë bashkë në hartimin e një platforme të përbashkët. /tesheshi.com/
