Nuk ka pritur Beogradi pas deklaratave të krerëve të Kosovës kundër ekstradimit të gylenistëve në Turqi. Ka shfrytëzuar rastin për të kapur momentin që të sigurojnë marrëdhënie të mira me Ankaranë.
Dhe këtë e ka vënë re edhe Sputnik, e cila ka publikuar një koment të gjatë që e titullon: “Shans i papritur për Serbinë: Thaçi dhe Haradinaj humbasin aleatin e fuqishëm nga Bosfori”.
Duke analizuar deklaratat e djeshme të Ramush Haradinajt dhe Kadri Veselit, që shkarkuan ministrin e Brendshëm dhe kreun e Inteligjencës pas ekstradimit të 6 gylenistëve, komentatori i Sputnik, Nenad Zoriç, thekson tashmë Erdogan u ka “vënë vizën” kryeministrit dhe kryeparlamentarit të Kosovës.
Nga ana tjetër, thekson portali i Kremlinit:“Marrëdhëniet mes Serbisë dhe Turqisë, edhe realacionet personale ndërmjet Vuçiç dhe presidentit Erdogan, janë në nivelin më të lartë që kanë qenë në një herë dhe kjo mund të frymëzojë një lloj të caktuar të besimit. Kurse pozicionet e Prishtinës po përkeqësohen ndërkombëtarisht. Presidenti i Turqisë, Erdogan përgëzoi Vuçiçin për sjelljen e tij gjakftohtë pas arrestimit të Marko Gjuriçit. Erdogan e telefonoi menjëherë presidentin serb dhe e ka falendëruar që nuk është bërë nxitës i incidentëve”.
Nemanja Staroviç, një historian i njohur në Serbi thekson se këto zhvillime janë surprizë e duhen pasur parasysh ndryshimet e mëdha që ka patur politika e jashtme e Turqisë gjatë disa viteve të fundit.
Staroviç shpjegon për Sputnik se Erdogan në politikat e tij ka prioritet natyrisht interesat e Turqisë dhe jo atë të Kosovës e të shqiptarëve.
Sipas medias së Kremlinit, ky ndryshim pasqyrohet në dy deklaratat e Erdogan. Njëra ishte ajo e vitit 2013 në Prizren, kur tha: “Kosova është Turqi, Turqia është Kosovë” dhe kur më vonë në vitin 2017, hodhi poshtë me vendosmëri çdo nocion të formimit të një Shqipërie të Madhe.
“Çështja është se, ndryshe nga një periudhë e mëparshme të mbështetjes së Ankarasë për Prishtinën, ajo i përshtatet interesave të reja dhe zhvillimeve të fundit. Kjo përshtatet në konceptin global të politikës së re turke, e cila thelbin e ka tek pavarësia dhe jo tek ndikimi i huaj”, shpjegon Staroviç.
Ai shton se si Serbia ashtu edhe Turqia kanë bërë të ditur se ata janë autonomë dhe nuk do të lejojnë të huajt që të vendosin në politikën e tyre.
Kurse duke iu referuar arrestimit të 6 anëtarëve të organizatës FETO, Sputnik nënvizon sjelljen e agjencisë shtetërore të lajmeve Anadolu, e cila në lidhje për operacionin e shërbimit sekret turk MTI theksonte se “është kryer diku në Ballkan, pa e përcaktuar se ai kishte ndodhur në Kosovë”.
“Ankaraja, sidomos pas 15 korrikut 2016 kërkon që të gjithë partnerët e saj ndërkombëtarë, duke nisur nga Shtetet e Bashkuara, të dorëzojnë Gulenin dhe anëtarët e rrjetit të tij. Kur qeveria turke kërkoi ekstradimin e një anëtari të organizatës FETO para pak kohësh, ekstradimi u zgjat disa muaj pasi u anulua nga gjykata. Tani Ankaraja vendosi të marrë një qasje krejtësisht të ndryshme dhe brutale duke e bërë fakt të kryer operacionin. Pra brenda ditës, duke përdorur operativët e tyre, agjencia e inteligjencës kreu arrestimin dhe deportimin e menjëhershëm të gjashtë shtetasve turq”, thekson Staroviç në komentin e tij.
Sputnik thekson se nuk është fare rastësi që në tre ditë ka pasur tre ngjarje të mëdha: telefonata e Erdoganit me Vuçiç, vizita në Serbi e Hakan Fidan, kreu i shërbimit sekret turk MIT, dhe arrestimi i gylenistëve.
Sipas Sputnik, “Prishtina nuk është i kënaqur me të gjithë këtë dhe pozitën e saj në arenën ndërkombëtare, duke përfshirë edhe mbylljen e dialogut në Bruksel. Nëse humb Turqinë që është mbështetësi kryesor i Kosovës, atëherë kë ka aleat Kosova?”. /tesheshi.com/
