Hoyt Brian Yee ka qenë dje në Beograd fiks me një intensitet kohor të njëtë me vizitat që ka zhvilluar në Kosovë, Shkup dhe Tiranë; vizita këto me rezultat të sukseshëm që sollën mbylljen e krizave të Shkupit dhe të Tiranës.
Zyrtari i lartë i Departamentit Amerikan të Shtetit, ka deklaruar nga Beogradi se Ballkani duhet të largojë influencën e Moskës, gjë që ka tërbuar këtë të fundit.
Media shtetërore invazive e Rusisë, “Sputnik”, e cila publikohet në të gjitha gjuhët e botës, ka sulmuar ashpër Drejtorin e Byrosë së Euroazisë në DASH pas qëndrimit të tij në Beograd.
Mirëpo ajo që bie në sy në këtë sulm të “Sputnik”-ut, që jo vetëm financohet nga Kremlini por edhe përdor një teknologji të ngjashme me shërbimet sekrete, është metoda e sulmit dhe gjuha ndaj zotit Hoyt Yee.
Po të lexosh shkrimin, ngjan me dy pika uji me sulmin që zyrtari i lartë i DASH u përball nga njerëzit e Sali Berishës, sapo mbërriti në Tiranë.
Një drejtues portali pranë opozitës dhe zyrtari i lartë i PD-së, Eno Bozdo, deklaruan se zoti Hoyt Yee është një diplomat i erës “Obama” dhe që tenton të sabotojë klimën e administratës Trump ndaj Shqipërisë.
Të njëjtën linjë, fiks pa asnjë ndryshim e ka përdorur “Sputnik”.
Në një analyze, portal i Kremlinit thekson se “ka një shtet brenda shtetit në DASH që synon të minojë dëshirën e Donald Trump për të përmirësuar marrëdhëniet me Rusinë.”
“Sputnik” bën të ditur se ka një koordinim të politikës që po ndjek një linjë e republikanëve kritikë ndaj Trump-it si John McCain për të imponuar politikën e tij në Ballkan.
“Për sa kohë që politika e jashtme amerikane në Ballkan dhe më gjerë, ndodhet në duart e SHBA-ve e të ashtuquajturit “shtet të thellë”, aq më shpejt ne në këtë rajon, në vend të paqes dhe stabilitetit, po vjen era e barutit”, shkruan media kryesore ruse, që kërcënon kështu për një destabilitet të rajonit.
“Sputnik” thekson se me ardhjen e Donald Trump-it u prit një ndryshim i politikës në Ballkan, por ka 4 muaj që asgjë nuk po ndodh.
Sipas medias shtetërore ruse, deklaratat e “buldozerit” të Trump-it, siç është quajtur Hoyt Yee, po japin gjithnjë e më shumë mesazhin e një vazhdimy të politikës aktuale.
Sasha Adamoviç, historian dhe analist politik, tha se “Hoyt nuk është një zyrtar tipik i erës Trump dhe ne jemi ende duke pritur për të parë se çfarë politike do të luajë presidenti amerikan në Ballkan.
Deri më tani Trump ka pasur disa prioritete të tjera të politikës së jashtme, si dhe një sërë problemesh në oborrin e shtëpisë së tij.”
“Thelbi i politikës së tij të re ndaj Ballkanit do të duhet të jetë në përputhje me synimet për të normalizuar marrëdhëniet me Rusinë. Normalizimi i këtyre marrëdhënieve do të jetë e dobishme për ne, sepse një politikë e tillë Ballkani do të garantonte paqen dhe sigurinë”, ka thënë Adamoviç.
Ai vazhdon duke paralajmëruar Trump-in se e ka “djallin” brenda Departamentit të Shtetit dhe duhet të shpëtojë prej tij.
Në këtë kontekst, Adamoviç, duke folur njësoj si njerëzit e Berishës në Tiranë por edhe të Gruevskit në Shkup, thekson se duhet të pritet se cilin do të caktojë Trump si përgjegjës për Ballkanin në Departamentin e Shtetit.
Adamovic shton: “Ne tashmë kemi pasur kohët e fundit vizitën e Senatorit McCain në Ballkan, i cili është anëtar i Partisë Republikane dhe një figurë me ndikim por që është opozitë ndaj Trump dhe njeriu që duket se kërkon të minojë tentativën mbi përmirësimin e marrëdhënieve me Rusinë. Hoyt është pjesë e të njëjtit koncept për Ballkanin, e cila është e përfaqësuar nga administrata e mëparshme në Uashington, dhe kjo është politika e vijës së zjarrit”.
Senatori John McCain është dhe kryetar i Komisionit të Senatit për Forcat e Armatosura të Shteteve të Bashkuara, i cili në prill të ishte në një vizitë në Serbi dhe gjithë vendet e Ballkanit, duke deklaruar më pas se “nuk është e qartë në cilin drejtim po shkon Serbia” dhe se “është shumë e qartë se rusët janë duke u përpjekur për të zgjeruar ndikimin e dëmshëm në Ballkan”.
Në një intervistë për Zërin e Amerikës, Senatori John McCain tha se “tentativa për grusht shteti në Mal të Zi është një shembull i qartë i dorës ruse, ajo ishte një përpjekje për të përmbysur qeverinë e zgjedhur të një vendi. Përpjekja për të rritur ndikimin në Serbi është një shembull tjetër.
Ka lajme të rreme dhe hakime që ndodhin vazhdimisht nëpërmjet Sputnik, RT etj.
Gjithashtu, ka tensione sidomos në mes të Serbisë dhe Kosovës, kështu që unë besoj se të gjitha këto janë rezultat i mungesës së lidershipit amerikan dhe evropian”.
Në të njëjtën intervistë, McCain tha se Amerika ka nevojë për shumë më tepër angazhim në Ballkan, dhe se ata nuk janë të kënaqur me marrëveshjen e lidhur nga Serbia për prokurimin e armëve nga Rusia.
As ish-Sekretari amerikan i Shtetit, John Kerry, i cili ishte në Beograd dy vjet më parë, nuk ishte i lumtur për marrëdhëniet mes Serbisë dhe Rusisë. Kerry ishte ai i cili tha se “Shtetet e Bashkuara besojnë se një numër i vendeve evropiane, përfshirë edhe Serbinë, janë në” vijën e zjarrit “, kur bëhet fjalë për marrëdhëniet mes Uashingtonit dhe Moskës, duke iu referuar rritjes së ndikimit të Rusisë në Evropë. /tesheshi.com/
