Nuk reshtin çuditë që sjell Sputnik-u rus, si një kuzhinë propagandistike e një gjuhe perandorake të re të influencës jo vetëm politike por edhe kulturore.
Portali rus, në edicionet e tij në mbi 30 gjuhë të botës ka publikuar sot një lajm, ku vizitën e një komisioni ndërkombëtar për të vëzhguar zgjedhjet në një rajon të Rusisë, e lidh me romanin e famshëm të Alexander Duma-s.
Kjo pasi i vetmi anëtar i vëzhguesve ndërkombëtar që foli mirë për zgjedhjet në rajonin rus, ishte pikërisht pasardhësi i Mosketjerit të Katërt të librit, ndër më të lexuarit dhe të ekranizuarit në botë, përkatësisht D’Artanjanit të pashëm e trim.
Sputnik shkruan se pasardhësi i Mosketjerit të katërt ka mbërritur në Rusi si vëzhgues zgjedhjesh së bashku me një delegacion të madh ndërkombëtarësh që i përmend pak.
Sipas Sputnik, Ameri D’Artanjan arriti në rajonin e Yaroslavl si vëzhgues ndërkombëtar në zgjedhje.
Në Yaroslavl mbahen zgjedhjet vendore dhe ka pasur shumë ankesa dhe kundërshtime kryesisht nga opozita, të cilat janë përmendur edhe nga vëzhguesit ndërkombëtar.
Por D’Artanjani, jo ai i mesjetës por ky i sotmi, thotë se është mahnitur nga mënyra elektronike e zgjedhjeve.
Në Yaroslavl është zbatuar një projekt pilot ku është votuar dhe numëruar elektronikisht. Por rezultati ka qenë “suprizë”: ka fituar thellë partia e Putinit.
Opozita thotë se gjithçka është komanduar nga një dorë. Por, Ameri D’Artanjan që ka ardhur si pjesë e Shoqatës së Vëzhguesve të “Monitorimit Publik Kombëtar”, thotë se makineria ka qenë perfekte.
Një deklaratë e rajonit të Yaroslavl thotë se Ameri D’Artanjan “i përket një familjeje të njohur të njohur nga letërsia botërore”.
Francezi është i kënaqur me zgjedhjet në këtë rajon, edhe pse thotë që ka pasur mjaft episode manipulimi.
“Ka pasur tentative manipulimi por në përgjithësi gjërat nuk shkuan keq”, tha D’Artanjan.
Ai lavdëroi sistemin elektronik të votimit në Rusi, sipas të cilit as në Francë nuk ka të tillë.
Përgatiti Ylli Pata – /tesheshi.com/
