Portali i Kremlinit Sputnik, në një analizë të gjerë mbi vizitën e zv.presidentit amerikan Mike Pence, në Mal të Zi, thekson se kjo vizitë është një përmbyllje e politikës amerikane të kontrollit të tre deteve të rëndësishëm të atij territori që quhet Euroazia.
Këto dete janë: Deti Balltik, Deti i Zi dhe Deti Adriatik. Pence vizitoi Estoninë, më pas Gjeorgjinë dhe e përfundon turin në Podgoricë.
Autori i shkrimit në Sputnik, Nebojsha Popoviç, thekson se “Zona nga Balltiku në Adriatk ka një rol të shumëfishtë. Përveç parandalimit të ndikimit rus në këto vende, SHBA synon të bllokojë apo të parandalojë një afrim ruso-gjerman”.
Popoviç i referohet babait të mendimit gjeopolitik anglo-sakson, që ishte gjeografi britanik Helford Mekinder, i cili e ka konsideruar Europën Lindore si “Zemra e botës” apo kontinenti Euroaziatik.
Mekinder ka theksuar se kush kontrollon Euroazinë do të kontrollojë pjesën tjetër të botës.
Nga ky ekuacion gjeopolitik, Sputnik përkthen politikën amerikane sot dhe vizitën e numrit dy të Shtëpisë së Bardhë që synon të largojë dyshimet se shefi i tij do të dobësojë fuqinë e jashtme të SHBA dhe do të lejojë Moskën të shtrijë influencën e saj në zonën e Euroazisë.
Sputnik thekson se SHAB po krijon një kordon sanitar në mes të Balltikut dhe Adriatik apo iniciativa e famshme e “Tre deteve.”
Duke vizatuar drejtëzën e turit të Pencë nga Estonia, në Gjeorgji dhe nesër në Mal të Zi, Sputnik thekson se SHBA me forcë i tregon “Rusisë arat e saj”. Pra kemi të bëjme me një lloj Jalte të re që Uashingtoni po i imponon Moskës si fakt të kryer përpara se dy superfuqitë ta ndajnë zyrtarisht.
Si për ta iluestruar këtë teori, Sputnik thekson se Donald Trump zhvilloi së fundmi një vizitë në Poloni, pikërisht në samitin e “Tre Deteve”.
Trump u tha qartë vendeve që morën pjesë në samit që këto shtete duhet të blejnë armë dhe gaz amerikan(jo thjesht i nxjerrë në SHBA por nga gazësjellësat që financon SHBA).
“Amerika është e gatshme për të garantuar sigurinë në Evropën Qendrore dhe Lindore”, tha Trump në një konferencë të përbashkët shtypi me presidentin polak Andrzej Duda.
Por sipas Sputnik, këtu ka një përplasje mes Uashingtonit dhe Berlinit.
Nëse SHBA votoi për sanksione të reja ndaj Rusisë, Berlini nuk i sheh këto sanksione me sy të mirë.
Dhe sipas portalit të Kremlinit, kriza më e re që do të ndodhë së shpejti është mes Uashingtonit dhe Berlinit. Mes dy kancelarive nuk ka më besim të ndërsjelltë.
Sputnik thekson se “kordoni sanitar” amerikan nga Balltiku në Adriatik nuk bëhet vetëm për të penguar Rusinë, por edhe Berlinin që të futet thellë në Ballkan por edhe Europën Lindore.
Nga ky kordon sanitar humb edhe Kina, e cila synon të hyjë fuqishëm në Euroazi.
Ballkani, sipas Sputnik është gjithashtu një nga pjesët më të rëndësishme të këtij mozaiku, në lidhje me pozicionin e tij dhe padyshim është “vija e zjarrit”.
“Vizita e zv.presidentit amerikan në Podgoricë, nuk bëhet thjesht që të bllokojë influencën ruse, por edhe të zvogëlojë depërtimin gjerman. Por kjo është e vështirë për t’ja shpjeguar si publikut në SHBA por edhe në Ballkan, ku Gjermania edhe zonja Merkel shikohet me sy të mirë, sidomos pas një procesi të nisur me Edi Ramën dhe Aleksandër Vuçiçin për të pajtuar vendet e Ballkanit mes njëri-tjetrit.
“Ndaj Zv.presidenti i SHBA vjen në Mal të zi duke mbajtur lart flamurin e NATO-s, organizatës ku SHBA është lidere dhe ku promovon sigurinë për shtetet e rajonit. Me pranimin edhe të Maqedonisë në këtë organizatë, mbyllet qarku duke e lënë Serbinë përballë një zgjidhje fatale.
Edhe nëse Serbia shkon drejt NATO-s, Boshnja vrapon menjëherë…”, thekson Sputnik.
/tesheshi.com/
