Qarqet ruse duket janë shqetësuar nga zgjedhjet lokale në Preshevë, të cilët anë arritur dy rezultate të rëndësishme: ka pasur një votim masiv nga rinia dhe fituesi i zgjedhjeve është një aktor politik që nuk manipulohet nga Beogradi, madje nuk di as serbisht.
Sputnik i ka rezervuar një shkrim të gjatë Shqipërim Arifit, fituesit të zgjedhjeve lokale në Preshevë, i cili ka dalë parti e parë me një diferencë të vogël me ndjekësin e tij që është PDSH e Ragmi Mustafës.
“Kush është gjermani që fitoi zgjedhjet në Preshevë?” Kështu e titullon shkrimin Brankica Ristiç, e ngarkuara për shqiptarët, në edicionin e sotëm të Sputnik-ut.
Dhe portali i Kremlinit gjen menjëherë lajmin e vërtetë të zgjedhjeve lokale në Preshevë: serbët kanë mbetur jashtë këshillit komunal.
Ky rezultat ka ardhur vetëm falë numrit të madh të rinisë në votime, ç’ka ka rritur përqindjen e partive shqiptare në Kuvendin e Komunës.
Shqetësimi që shpreh Ristiç në shkrimin e Sputnik, është se Shqipërim Arifi, i cili do të bëhet kryetar i komunës së Preshevës, ka gjasa të shkojë më parë në Tiranë apo Prishtinë, sesa në Beograd.
Dhe në fakt, një vit më parë kur Arifi e drejtoi Preshevën me një koalicion me PVD-në e Riza Halimit, vinte në Tiranë çdo javë, çka bëri që Beogradi të lobojë për shkarkimin e tij, i cili edhe ndodhi.
Por sot, Aleanca për Ndryshim, një parti krejt e re e drejtuar nga Shqipëri Arifi, ka fituar mazhorancë absolute, duke pasur rreth vetes kryesisht rininë e Luginës.
Sputnik, në një profil për Arifin thekson se ai është rritur në Gjermani dhe nuk di asnjë fjalë serbisht.
Ljiljana Stojanoviç, kryeredaktorja portalit më të klikuar në jugun e Serbisë “pres za jug”, thekson për Sputnik se “fitorja e Shqipërim Arifit nuk ishte aspak një surprizë, sepse ai ka fituar besimin e të rinjve shqiptarë në radhë të parë, por edhe për shkak se ai flet më shumë për papunësinë, e cila është një pikë e thelbësore e komunës”.
Megjithatë, Stojanoviç e shikon edhe në një prizëm tjetër fitoren e ANSH-së: në kontekstin kuqezi.
“Gjatë këtyre zgjedhjeve atmosfera ishte disi e infektuar me sindromën kombëtare. Kjo platformë u zbatua në mënyrë perfekte nga Shqipërimi, një burrë nga diaspora shqiptare i cil ka shumë ndikim, financiarisht dhe politikisht. Gjithashtu, të gjithë atë e shohin si një njeri që është i interesuar për ekonominë, biznesin dhe dikush që mendon në gjermanisht”, thotë Liljana.
Sputnik thekson më tej se tek fjalori elektoral i Shqipërim Arifit, ka shumë flamur kuqezi dhe shumë “shqiptari”, ndaj ekziston shqetësimi në Beograd se këto zgjedhje i ngjajnë pak a shumë një referendumi për shkëputje.
Me tej Sputnik thekson se gara e brendshme në zgjedhjet e Preshevës, ishte edhe ajo se kush e ka më shumë mbështetjen e Edi Ramës në Tiranë dhe Ramush Haradinajt në Prishtinë.
Sipas portalit të Kremlinit, këtë “garë” e fitoi Shqipërim Arifi.
“Tani presim të shohim se si do të konfigurohet koalicioni qeverisës. Unë mendoj se Arifi do të bashkohet me një grup që u nda nga Partia Demokratike e Shqiptarëve të udhëhequr nga Sami Salihi, por kam ende një shpresë që pas ripërsëritjes së zgjedhjeve në disa qendra, serbët do të hyjnë në Kuvend dhe ANP të bëjë aleancë me ta. Në qoftë se zgjedhjet e përsëritura në një qendër votimi në fshatin Bushtranje, i banuar nga serbët, do të arrijnë të marrin 20 vota, atëherë partia që përfaqëson serbët do të jetë kingmakeri i qeverisjes së Preshevës”, vlerëson Stojanoviç.
Më tej, Sputnik thekson se “Arifi nuk e njeh gjuhën serbe dhe mësoi shqipen në moshën 19 vjeç, duke folur me gruan e tij.
Sipas asaj që dihet rreth tij, është se është shumë besimtar, një musliman praktikant i devotshëm. Gruaja e tij, një mjeke gjinekologe është e mbuluar dhe ka shumë reputacion në radhët e grave dhe vajzave në Preshevë, çka u reflektua edhe në zgjedhje”.
Por ajo që e alarmon protalin rus është fakti që Shqipërim Arifi do të bëjë koalicion me Sami Salihun, një ish-pjesëtar i UÇPMB-së.
Në zgjedhjet e jashtëzakonshme lokale që u zhvilluan në të gjithë Serbinë-në Preshevë fitoi APN me 5504 vota, në vend të dytë u rendit PDSH e Ragmi Mustafës me 4500 vota. Në vend të tretë doli Partia për Veprim Demokratik me 1870 vota. Lëvizja për reformimin e PDSH mori 1419 vota, ndërsa partia serbe mori 840 vota.
Përgatiti: Ylli Pata – /tesheshi.com/
