Papa Françesku ka urdhëruar që kardinalëve t’ju ulen pagat me 10 përqind, por që dhe pagat e priftërinjve të tjerë në Vatikan të ulen me qëllmin për të kursyer vendet e punës të punonjësve të zakonshëm pasi pandemia e koronavirusit ka goditur të ardhurat e Selisë së Shenjtë.
Francesku shpesh thotë se nuk donte të pushonte njerëz nga puna.
Mendohet se kardinalët që punojnë në Vatikan dhe jetojnë atje ose në Romë, kanë një pagë mujore prej rreth 4000-5000 euro.
Për udhëheqësit e tjerë të shërbimeve, kryesisht priftërinjtë, pagat do të ulen me ndërmjet tre përqind dhe tetë përqind. Rritjet e programuara të pagave do të pezullohen deri në mars 2023.
Dispozitat do të zbatohen gjithashtu për stafin e vjetër të bazilikave papale, përveç Bazilikës së Shën Pjetrit në Vatikan.
Selia e Shenjtë, organi qendror qeverisës i Kishës Katolike, mund të duhet të përdorë 40 milion euro nga rezerva për të dytin vit me radhë ndërsa pandemia COVID-19 djeg financat, tha zyrtari më i lartë ekonomik i Vatikanit në fillim të këtij muaji.
Një deficit prej rreth 50 milion euro pritet këtë vit. Muzetë e Vatikanit, një burim tradicional i të ardhurave, kanë qëndruar të mbyllura për të paktën 15 muaj për shkak të pandemisë. /tesheshi.com/
