Në mes të luftës në Ukrainë, Nikolai Patrushev, sekretar i Këshillit të Sigurisë Kombëtare të Rusisë dhe shefi i inteligjencës i Vladimir Putin, do të mbërrijë në Beograd të hënën për t’u takuar me presidentin serb Aleksandar Vuçiç.
Zyrtarisht, Patrushev po vjen në Beograd për të shkëmbyer informacione me autoritetet serbe për vullnetarët nga Shqipëria, Bosnja dhe Kosova, të cilët dyshohet se ndodhen në rajonin e Donbasit dhe po luftojnë në anën e Ukrainës.
Konkretisht, ministri i Jashtëm rus Sergei Lavrov së fundi deklaroi se autoritetet ruse janë duke i kontrolluar informacionet se në Donbas kanë mbërritur mercenarë nga Ballkani. Autoritetet serbe e mbështetën menjëherë këtë pretendim, duke thënë se deklaratat e Lavrovit duhet të merren seriozisht, sepse vijnë nga një njeri që është një nga autoritetet supreme të diplomacisë botërore.
Gjithsesi, pretendimet e Lavrov u mohuan menjëherë nga institucionet zyrtare të Shqipërisë dhe Kosovës.
Patrushev vjen në Beograd në një kohë kur gjithnjë e më shumë vlerësohet se Rusia do të hapë një pikë të re të krizës në Bosnje, Kosovë dhe Mal të Zi për të hequr fokusin e politikës evropiane nga Ukraina.
Sipas këtyre vlerësimeve, pritet një tentativë për destabilizimin e situatës në këto vende, me historinë e mercenarëve të huaj në Ukrainë që duket se është një sajesë pikërisht për këtë gjë. /tesheshi.com/
