Shërbimet e inteligjencës daneze janë të shqetësuara për rritjen e aktiviteteve të spiunazhit në territorin e këtij vendi skandinav, sipas një raporti të publikuar të enjten, kur kreu i shërbimit të inteligjencës ushtarake ndodhet në paraburgim me akuzën e nxjerrjes së dokumenteve konfidenciale.
“Një numër vendesh të huaja po kryejnë në mënyrë aktive aktivitete të inteligjencës kundër Danimarkës dhe kërcënimi i spiunazhit është rritur vitet e fundit,” tha inteligjenca daneze.
Ky kërcënim, i cili përfshin spiunazhin, ngacmimin, përpjekjet për të përvetësuar në mënyrë të paligjshme produkte, teknologji dhe njohuri dhe, në raste të jashtëzakonshme, tentativa për vrasje, shtrihet në Territoret Autonome Daneze, Ishujt Faroe dhe Grenlandë, veçanërisht për shkak të interesit të saj në Arktik.
Sipas raportit, kërcënimi vjen kryesisht nga Rusia, Kina dhe Irani.
“Kina po bën përpjekje të mëdha për të transferuar teknologjinë dhe njohuritë”, tha për Politike-n shefi i inteligjencës Anders Henriksen. Sipas tij, ekziston një kërcënim latent në formën e shkëmbimeve studentore.
Televizioni danez raportoi të hënën se kreu i shërbimit të inteligjencës ushtarake daneze, Lars Findsen, ishte lënë në paraburgim për përfshirjen e tij në një rast që përfshin një rrjedhje informacioni “shumë konfidencial”.
Katër punonjës aktualë dhe ish-punonjës të dy shërbimeve daneze të inteligjencës u arrestuan në dhjetor për rrjedhje të informacionit tepër konfidencial. Findsen është i vetmi që mbetet në paraburgim ndërkohë që hetimet vazhdojnë.
Rasti, për të cilin autoritetet kanë dhënë shumë pak informacion, po mbahet me dyer të mbyllura, që do të thotë se pretendimet e sakta dhe natyra e informacionit të rrjedhur nuk janë bërë publike.
Sipas televizionit, çështja sillet rreth rrjedhjeve të informacionit konfidencial në mediat daneze. /tesheshi.com/
