Nga Musa Mustafa
Një spital i ri në fshatin Pasjan të Gjilanit ku jeton një komunitet serb, është katandisur si mos më keq. Thënë më troç, janë vetë serbët që e kanë rrjepur, duke nisur që me ilaçet. Ky spital u përurua kohë më parë nga vetë kryeministri Aleksandar Vuçiç.
Por ai, a më saktë Marko Gjuriç, shef i Zyrës serbe për Kosovën, nuk ka lejuar që aty të punësohen serbë lokalë, nga ata me arsim përkatës. Stafi i atyshëm i përket serbëve që vijnë nga Serbia ose nga Veriu, e që në vend që të shërbejnë, e kanë shndërruar spitalin në burim përfitimesh, duke e degraduar shërbimin e atyshëm.
Spitali është ndërtuar me fondet e qeverisë së Kosovës.
Mjekët nga kjo treve i kanë thënë portalit tesheshi.com se në bazë të marrëveshjes së Brukselit, shëndetësia është paraparë që të jetë nën kujdesin e erbisë, por tani më ilaçet mungojnë ndërsa barnatoret në afërsi të spitalit janë përplot me barna që është dashur të jenë në spital.
Flitet deri për mungesë paracetamoli apo shiringash.
Jo vetëm barnat që janë duke u keqpërdoruar por edhe vetë objekti.
Kështu, në repartin e Gjinekologjisë tani është vendosur administrata e këtij spitali, ndërsa nënat që lindin duhet të udhëtojnë me kilometra të tëra në Graçanicë apo veri të Mitrovicës për të lindur.
Këto informata vijnë nga një burim konfidencial, që thotë se barnat që sillen nga Serbia falas për këtë spital, janë duke u vjedhur nga syrtarë të lartë të qeverisë serbe, por dhe nga serbë të Kosovës. “Ato janë duke u shituar në barnatoret që janë në afërsi të spitalit dhe të shtëpive të shëndetit”, ka thënë burimi.
Po ashtu, burimi informon se në Partesh dhe Kllokot, mjekët mungojnë deri në15 ditë, edhe pse ka shumë të moshuar që kanë nevojë për kurim.
“Kryeministri Vuçiç na ka premtuar personalisht se do të na ofrojë shëndetësi të mirë, por ne tani jemi shumë më keq se menjëherë pas luftës”, shton burimi, duke shtuar se “Vuçiç në mënyrë të turpshme po e keqpërdor shëndetësinë duke i punësuar mjekët të cilët kanë familjet e tyre në Serbi, ndërsa fëmijët e serbëve lokale që kanë përfunduar shkollën për medicinë, punojnë në bujqësi në tregti, por edhe shumë prej tyre janë duke ikur në Perëndim”. /tesheshi.com/
