Banorët e Hawaii-t u befasuan në fund të janarit nga një pamje e pazakontë në qiellin e natës. Megjithatë, nuk bëhet fjalë për asgjë aliene apo mistike, por për formën që lind pas lëshimit të satelitit SpaceX, shkruan Guardian.
Spiralja e pazakontë u vërejt për herë të parë nga Observatori Kombëtar Astronomik i Japonisë më 18 janar, menjëherë pas lëshimit të raketës Falcon 9 të SpaceX që mbante një satelit ushtarak.
“Më dërguan videon. Dukej e pabesueshme”, tha astronomi Ichi Tanaka.
“Spiralja misterioze në qiell u kap nga kamera Subaru-Asahi Star mbi vullkanin Mauna Kea në Hawaii. Skena duket të jetë e lidhur me lëshimin e një sateliti të ri SpaceX”, shton Tanaka.
Edhe pse konfirmimi zyrtar nuk ka ardhur ende, duket se bëhet fjalë për një lëshim satelitor. Gjegjësisht, diçka e ngjashme u pa në qershor 2022 mbi Queenstown në Zelandën e Re edhe pas lansimit në Florida. /tesheshi.com/
