Kryeredaktori i televizionit nacional TVSitel – televizion ky i afërt me pushtetin – Dragan Pavloviç Latas, i cili ndonëse është spiker lajmesh, më shumë komenton situatat politike se sa informon opinionin, në edicionin e fundit të lajmeve ka shfaqur simpatitë ndaj VMRO-DPMNE-së, duke akuzuar LSDM-në si parti shqiptare.
“LSDM është partia më e madhe shqiptare për momentin, pasi ka 70.000 vota prej tyre. LSDM është parti shqiptare dhe këtu nuk ka dilema, ajo i përfaqëson interesat shqiptare”, ka deklaruar Latas.
Ai gjithashtu ka shtuar se partia e vetme që mund t’i mbrojë interesat e maqedonasve është partia e Gruevskit, sipas tij qoftë në mënyrë institucionale, ose nëse paraqitet nevoja edhe në rrugë.
“Interesat maqedonase do t`i mbroj VMRO-ja, në rrugë ose në Parlament njëjtë. Pra vetëm VMRO, nuk ka tjetër”, ka shtuar Latas.
Në fund Latas nuk ka përjashtuar formimin e qeverisë ndërmjet LSDM-së dhe partive shqiptare, por sipas tij, nëse ndodh një gjë e tillë, do të vijojnë zgjedhje të reja deri në fund të vitit. M.Krasniqi – /tesheshi.com/
