Pas vrasjes së një prej udhëheqësve të opozitës ruse, Boris Nemtsov-it, Rusia gëlon nga thashethemet, me njerëz që kanë një larmi interpretimesh mbi vrasjen. Ndërsa kritikët fajësojnë presidentin rus për vrasjen e Nemtsov-it, Kremlini e quajti vrasjen një provokim për qeverisjen e Putin-it.
Kritikët besojnë se vrasja e Nemtsov-it ishte vepër e presidentit rus Vladimir Putin, apo e aleatëve të tij në Kremlin. Shumë e fajësojnë atë, edhe nëse ai nuk qe urdhëruesi i drejtpërdrejtë i vrasjes së opozitarit rus.
Vrasja lidhet nga ca zëra dhe me krizën ukrainase. Presidenti ukrainas, Petro Poroshenko, fajësoi Kremlinin për vrasjen, duke deklaruar se Nemtsov-i po përgatiste të bënte të njohur botërisht një raport, gjë që i shqetësoi autoritetet ruse. “Dikush qe i frikësuar nga kjo. Boris-i nuk ishte. Vrasësit, ekzekutorët, ishin të frikësuar, “ u shpreh presidenti ukrainas, duke iu referuar raportit mbi të cilin po punonte Nemtsov-i, që paraqiste me hollësi praninë e trupave ruse në Ukrainë, një pretendim që Kremlini e mohon kategorikisht.
Nemtsov, një figuri e urryer për aktivistët pro Kremlinit, kishte kohë që ankohej se ndiqej dhe i përgjohej telefoni. Tensionet me Perëndimin mbi Ukrainën dhe marrja e Krimesë e kanë polarizuar gjithnjë e më tepër shoqërinë ruse, me pjesën më të madhe të rusëve në mbështetje të Putin-it, por me një pakicë në mospajtim të hapur.
Ndërkohë, presidenti rus, Putin-i, premtoi ndëshkimin e përgjegjësve për vrasjen e Nemtsov-it. Midis interpretimeve të ndryshme të politizuara të vrasjes të politikanit të spikatur opozitar rus, ministri rus i Punëve të Jashtme, Sergey Lavrov, tha se, “Krimi i ndyrë do të hetohet në përputhje të plotë me ligjin, dhe fajtorët nuk do t’i shpëtojnë ndëshkimit.”
Megjithatë, besohet se hetimet e rasteve të tilla kanë pak besueshmëri në Rusi, një vend ku shoqëritë private dhe oligarkët kanë patur një ndikim të gjerë mbi politikën ruse. Prandaj grupet opozitare mendojnë se mundësia e një hetimi të njëmendtë është relativisht e vogël në Rusinë e Putin-it./tesheshi.com/
