Fitorja mbrëmë e Mançester Sitit ndaj Barcelonës shpjegon fare qartë se ç’do të thotë të kesh Guardiola-n trajner. Pas fitores në derbin e Mançesterit javë të shkuara në Premier League, mposhtja e Barcelonës mbrëmë është një tjetër provë e aftësisë së jashtëzakonshme të Guardiola-s për ta shndërruar një ekip.
Mançester Siti i ktheu reston mbrëmë Barcelonës për atë humbje të thellë të 19 tetorit. Guardiola kishte kërkuar një ndeshje të luajtur përsosurisht nga lojtarët e tij, por edhe pse nuk ngjau tërësisht kështu, anglezët fituan 3-1 ndaj katalanasve.
“Jam shumë i lumtur për djemtë. Eshtë hera e parë që kemi mundur ekipin më të mirë në botë”, deklaron Guardiola pas ndeshjes.
Ja si ka reaguar Luis Enrique: “Barcelona luajti 40 minuta futboll skandaloz!”
Messi do të drithëronte një stadium të tërë me golin e tij, por dy golat e gjysmëturkut e gjysmëgjermanit İlkay Gündoğan, e një tjetër gol fenomenal nga De Bruyne, do ta bënin mbrëmjen mahnitëse në “Etihad Stadium”.
Rezultatet e takimeve të tjera të Champions League-s në mbrëmjen e së martës sollën kualifikimin që tani të Arsenalit e të PSG-së në grupin A, si dhe të Atletikos së Madridit e të Bajernit të Mynihut në grupin D.
Shtatë sfidat e tjera do të jepnin këto përfundime: Beshiktash 1-1 Napoli, Ludogorec 2-3 Arsenal, Bazel 1-2 PSG, Benfika 1-0 Dinamo e Kievit, Borusia e Mynshegladbahut 1-1 Sëlltik, Atletiko e Madridit 2-1 Rostov, PSV Eindhoven 1-2 Bajern i Mynihut. /tesheshi.com/
