Prej ditës së mërkurë, kur u mësua shtyrja e takimit të ambasadorëve të Shteteve të Bashkuara të Amerikës dhe Bashkimit Europian me tre grupet parlamentare, përkatësisht PS, PD dhe LSI, shumë qarqe mediatike kanë dhënë versione të ndryshme të shkaktarëve të shtyrjes, por edhe të shkaqeve të saj.
Deri më sot janë thënë shumë, por burime diplomatike i bënë të ditur tesheshi.com se gjithçka e ka burimin tek një qëndrim thuajse i njëjtë si nga PD-ja ashtu edhe nga LSI-ja, për një pjesë kyçe të Reformës në Drejtësi, apo që përbën “thembrën e Akilit” të saj.
Pikërisht pjesës që flet për Gjykatën Speciale të Shkallës së Parë dhe të Apelit.
Sipas draftit të komisionit të ekspertëve, do të shkrihen dy shkallët e gjykatave të Krimeve të Rënda që janë ndërtuar që prej vitit 2002.
Këto do të jenë të parat që do ta pësojnë nga transformimi apo ndryshimi i gjyqësorit, pasi këto gjykata kanë qenë dëshmia e mosfunksionimit të drejtësisë për krerët e mafies dhe politikanët e korruptuar.
Me shkrirjen e Gjykatës së Krimeve të Rënda, krijohen nga fillimi dy shkallë gjyqësori me seli aty ku ndodhet Gjykata e Krimeve të Rënda, por njerëzit do të emërohen nga fillimi.
Bëhet fjalë për “veteranë” apo modele të drejtësisë që kanë dhënë prova jo korruptimi, por edhe të laureuar për drejtësi në universitetet më në zë botërore.
Që tani ka nisur që të diskutohen dhe “të peshkohen” njerëzit e mundshëm që do të punojnë në Gjykatën Speciale. Emërimi i tyre, sipas draftit të reformës, bëhet jashtë kontrollit aktual politik dhe PD e LSI kanë kërkuar ndryshimin e statusit të kësaj gjykate dhe bilancimin politik të Këshillit të Lartë Gjyqësor, i cili është organi që do të miratojë anëtarët e Gjykatës Speciale.
Siç mësohet, rrogat e gjyqtarëve të Gjykatës Speciale do të jenë mbi 4 mijë dollarë në muaj dhe për 5 vjet buxheti do të mbulohet nga qeveria e Shteteve të Bashkuara të Amerikës.
Gjykatat Speciale do të gjykojnë krimet e korrupsionit, trafikimit të drogës, qenieve njerëzore dhe vrasjes së cilësuar.
Gjykata Speciale do të ketë nomenklaturë të kryejë procesin ndaj zyrtarëve të lartë.
Në draftin e reformës theksohet se nomanklaturë e speciales do të jenë:
“Funksionarë të lartë përfshijnë Presidentin në detyrë dhe ish-Presidentët e Republikës, Kryetarin në detyrë dhe ish-Kryetarët e Kuvendit, Kryeministrin në detyrë dhe ish-Kryeministrat, anëtarët e Këshillit të Ministrave në detyrë, anëtarët e Këshillit të Ministrave gjatë tre viteve të fundit, Prokurorin e Përgjithshëm, Inspektorin e Lartë të Drejtësisë, Kryetarët e Bashkive dhe deputetët e Kuvendit, zëvendësministrat, anëtarët e Këshillit të Lartë Gjyqësor dhe të Këshillit të Lartë të Prokurorisë, anëtarët e Gjykatës Kushtetuese, Gjykatës së Lartë dhe Gjykatës së Lartë Administrative, dhe drejtuesit e institucioneve shtetërore qendrore ose të pavarura të përcaktuara në Kushtetutë ose në ligj”.
Kryetari i gjykatës dhe gjyqtarët e këtyre gjykatave shkarkohen përpara përfundimit të mandatit në rastet e shkeljeve të rënda disiplinore me dy të tretat e votave të Këshillit të Lartë Gjyqësor. Gjyqtarët dhe administrata gjyqësore u nënshtrohen verifikimit të pasurisë dhe të figurës.
Këshilli i Lartë Gjyqësor nuk mund të emërojë asnjë gjyqtar pa marrë pëlqimin e tij dhe familjarëve të afërt për kontrollet periodike të llogarive bankare dhe telekomunikimeve personale, sipas ligjit. Telekomunikimet personale të familjarëve të afërt të cilët nuk kanë dhënë pëlqimin, do monitorohen vetëm me vendim gjykate./tesheshi.com/
