Pak ditë pas Hashim Thaçi duhet të udhëtojë drejt Uashingtonit për ulje me Vuçiç në Shtëpinë e Bardhë, Specialja në Hagë, ajo e destinuara për UÇK-në, ka ngritur akuzë ndaj tij dhe Kadri Veselit.
Ata akuzohen për krime kundër njerëzimit dhe krime lufte që përfshijnë vrasje, burgosje të detyruar, përndjekje dhe tortura.
Aktakuza gjithashtu pretendon se Thaçi, Veseli e të tjerë, dyshohen për gati 100 likuidime.
“Krimet e paraqitura në aktakuzë përshijnë qindra viktima të identifikuara shqiptarë, serbë dhe romë të Kosovës dhe kundërshtarë politikë”, u tha në një deklaratë nga zyra e Prokurorit.
Ndërkohë, si arsye e ngritjes së aktakuzës, jepet ajo që siç thuhet në deklaratën nga Haga, “Prokurori i Specializuar e gjykon të domosdoshëm nxjerrjen e këtij njoftimi publik për akuzat, për shkak të përpjekjeve të përsëritura të Hashim Thaçit dhe Kadri Veselit për pengimin dhe sabotimin e punës së Dhomave të Specializuara të Kosovës”.
Por a lidhet ky zhvillim i befasishëm me tryezën e pritshme të Uashingtonit?
Toby Vogel, ekspert në Këshillin për Politikën e Demokratizimit, në një përgjigjje për REL, tha.
“Ka qenë e ditur që Prokuroria po punonte në aktakuzë, kështu që thelbi i saj nuk është befasi. Sidoqoftë, koha dhe formulimi i ashpër i njoftimit për shtyp, tregojnë se Prokuroria ka frikë nga një lloj marrëveshjeje e presidentit Thaçi, i cili mund të dëmtojë punën e gjykatës. Ka mundësi që ky njoftim publik, të jetë i provokuar nga takimi në Shtëpinë e Bardhë, të shtunën”, ka thënë Vogel. /tesheshi.com/
