Nga Blendi Gashi
Përfundimisht, Kadri Veseli e ka hequr nga vetja përgjegjësinë sa i përket shfuqizimit apo jo të Gjykatës Speciale, pasi Kryesia e Kuvendit të Kosovës ka dërguar për mendim në qeveri iniciativën e 43 deputetëve për shfuqizimin e ligjit për këtë gjykatë, duke ja lënë në dorë “pataten e nxehtë”, kryeministrit Ramush Haradinaj.
Dhe këtë e arriti falë Lëvizjes Vetëvendosje e cila qëndroi në mbledhje duke bërë kuorumin, çka nuk vepruan njëjtë LDK-ja e cila braktisi mbledhjen.
Se VV arriti atë që deshi, tregon edhe fakti se ditë më parë kjo parti paralajmëroi se tentativa për zhbërjen e Speciales do të shkojë në Kuvend si projektligj i qeverisë e jo si nismë e deputetëve në Kuvend.
“Kurti, Mulhaxha-Kollçaku dhe Konjufca përsëritën qëndrimin e Lëvizjes VETËVENDOSJE! mbi padrejtësinë dhe dëmin që shkakton Gjykata Speciale por edhe për mungesën e seriozitetit dhe sinqeritetit të kësaj iniciative. Sidoqoftë, iniciativa tash ka ndryshuar formën dhe shpejtësinë pasi që ajo do të vie si Projekt-Ligj i qeverisë e jo më si nismë e deputetëve në Kuvend”, thuhet në njoftimin e lëshuara para ca ditësh nga Vetëvendosje.
Ndaj kësaj deklarate reagoi fuqishëm Zyra e kryeministrit Haradinaj, e cila për mediat kosovare tha se me Specialen nuk bën të bëhen lojëra të tilla për përfitime personale e politike.
“Nuk komentojmë deklarata të liderëve të partive politike për çështje të këtilla. Ne respektojmë nismën e deputetëve të Kuvendit të Kosovës për Dhomat e Specializuara. Megjithëkëtë, temat e këtilla të ndjeshme nuk duhet të shërbejnë për lojëra dhe përfitime personale e politike”, tha qeveria.
Ramush Haradinaj kishte refuzuar të niste nga qeveria zhbërjen e Gjykatës Speciale, por kishte përkrahur nismën e deputetëve, të cilët dështuan për shkak se s’kishin kuorum për ta çuar në parlament këtë iniciativë.
Mbetet të shihet tashmë se çfarë vendimi do të marrë qeveria, pra nëse do e çojë apo jo si projektligj në Kuvend, iniciativën për zhbërjen e Speicales apo do të tërhiqet nga kjo kërkesë.
Pra tani i gjithë presioni mbetet tek Ramushi dhe ministrat e tij të cilët do të vendosin se nëse do të dërgohet apo jo kjo nismë në qeveri si projektligj.
Kujtojmë se nga anëtarët e Kryesisë që morën pjesë në mbledhjen e Kryesisë, i vetmi që votoi kundër vendimit që nisma për zhbërjen e Speciales të shkojë në qeveri ishte Xhavit Haliti. Ky i fundit është kategorik që Specialja nuk duhet të zhbëhet. /tesheshi.com/
