Gjykata Speciale në Hagë konfirmoi sonte se nënkryetari i Shoqatës së Veteranëve të UÇK-së, Nasim Haradinaj, është vendosur në paraburgim në gjykatë në Scheveningen.
Haradinaj, i arrestuar dje në Prishtinë, akuzohet për “vepra penale kundër gjyqësorit, pra frikësim të dëshmitarëve, hakmarrje dhe shkelje e fshehtësisë së procedurës, sipas Kodit Penal të Kosovës”, thuhej në deklaratë.
Presidenti i Shoqatës së Veteranëve të UÇK-së, Hysni Gucati, i cili ka qenë në paraburgim në Hagë që nga mbrëmja e kaluar, gjithashtu akuzohet për të njëjtat krime.
Se kur Gucati dhe Haradinaj do të sillen para një gjykatësi në Hagë për herë të pare, do të shpallet “sa më shpejt të jetë e mundur”, tha gjykata.
Shoqata e Veteranëve të UÇK-së pretendoi se ditët e fundit, persona të panjohur kishin dorëzuar sasi të mëdha të dokumenteve konfidenciale me titullin e Këshillave të Specializuara të Kosovës, i cili është emri zyrtar i gjykatës në Hagë.
Prokurori Jack Smith paralajmëroi katër ditë më parë se ai do të ndiqte penalisht këdo që zbulonte identitetin e një dëshmitari ose botonte informacion që mund të zbulonte se kush ishin dëshmitarët.
Në një deklaratë, Smith më pas akuzoi Shoqatën e Veteranëve të UÇK-së për “përfshirje të përsëritur në veprimtari që synojnë minimin e administrimit adekuat të drejtësisë”.
Sipas deklaratës së Smith, Shoqata e Veteranëve të UÇK-së siguroi dokumente konfidenciale për gazetarët në Kosovë, të cilët, megjithatë, refuzuan t’i botojnë ato ose i kthyen në gjykatën e Hagës.
Prokurori pastaj theksoi se shumë gazetarë në Kosovë “thanë qartë se aktivitete të tilla minojnë shtetin e ligjit dhe rrjedhën e drejtësisë”.
Smith vuri në dukje se gazetarët e kuptuan se “pjesëmarrja në ndarjen e një informacioni të tillë mund të përbënte një vepër penale sipas Kodit Penal të Kosovës”.
“Prokuroria e Specializuar është e angazhuar për të hetuar dhe ndjekur penalisht individët që kanë kryer krime të tilla, duke përfshirë zbulimin e identiteteve të personave që mund të thirren në gjykatë ose ndonjë informacion që mund të çojë në identifikimin e tyre,” paralajmëroi Smith. /tesheshi.com/
