Nga Mensur Krasniqi
Pas një pauze të gjatë kohore riaktivizohet Prokuroria Speciale Publike në Maqedoni. Ky institucion i pavarur sot ka njoftuar për hapjen e dy lëndëve të reja: “Tarifa” dhe “Tanku”.
Në rastin “Tarifa”, siç thuhet në komunikatën e kësaj prokurorie, janë përfshirë shtatë persona, nën dyshimin se kanë bërë veprën penale “Keqpërdorim të detyrës zyrtare nga neni 353 alinea 5, nga Ligji për Kodin Penal”.
Ndërkaq, në rastin tjetër, “Tanku”, janë përfshirë dy persona, nën dyshimin se kanë bërë veprën penale “Keqpërdorim të detyrës zyrtare dhe autorizime nga neni 353 alinea 5, nga Kodi Penal”, me ç‘rast, siç thonë nga Prokuroria, ia kanë plotësuar dëshirën për makinë luksoze ish-kryeministrit Nikolla Gruevski.
Veprat dyshohen se janë kryer në periudhën prej muajit shkurt deri në fund të tetorit 2012.
Në vazhdim janë komunikatat e PSP-së lidhur me dy rastet në fjalë:
Komunikata e PSP-së në lidhje me rastin “Tarifa”
Në rastin konkret, ekziston dyshimi se është bërë keqpërdorimi i detyrës zyrtare nga persona zyrtarë dhe përgjegjës në procedurën për furnizim publik me softuer-ERP Sistem për nevojat e SHA “ELEM”, gjatë të cilës, personat e dyshuar me moskryerjen e obligimit i kanë mundësuar personit fizik- konzorcium, i cili më vonë ka fituar tenderin, që të kualifikohet në fazën e dytë për të negociuar gjatë ankandit publik, edhe pse nuk ka dorëzuar dokumentacion të plotë. Vlera e Marrëveshjes është 4.092.420 euro. Njëkohësisht, ekziston dyshimi se një pjesë e personave të dyshuar pa bazë kanë miratuar të paguhen mjete në të holla në emër të licencave për mirëmbajtje të softuerit, kjo, në kundërshtim me kushtet e posaçme nga Marrëveshja për furnizim publik, ku është e parashikuar se pagesa në emër të licencave për mirëmbajtjen e softuerit do të bëhet në periudhë e garancionit dhe postgarancionit, periudhë e cila asnjëherë nuk ka filluar të rrjedhë, ngase sistemi nuk është implementuar, me çka është shkaktuar dëm prej 456.560 euro.
Po ashtu ekziston dyshimi se një person juridik nga konzorciumi, edhe pse ka qenë subjekt i autorizuar për furnizim dhe implementim të modulit për menaxhim të dokumentacionit, megjithatë është bërë furnizimi i modulit të tillë nëpërmjet persona të tjerë juridikë me marrëveshje të posaçme, edhe pse ky modul është parashikuar në Ofertën e konzorciumit dhe për të nuk ka qenë e nevojshme furnizim i posaçëm.
Njëkohësisht ekziston dyshimi se pas furnizimit të modulit për menaxhim të dokumentacionit, një nga personat e dyshuar ka lëshuar certifikatë për pranim operativ të modulit, që është kusht për miratim të pagesës në bazë të implementimit të modulit, edhe pse ekzistojnë argumente të shkuara se moduli nuk është vënë në funksion. Në bazë të certifikatës së tillë, një pjesë e të dyshuarve kanë miratuar rroga në vlerë prej 16.800 euro.
Nga faktet del edhe ajo që është më e rëndësishme, se një pjesë e madhe e sistemeve nuk janë implementuar, edhe pse për to janë paguar 3.700.000 euro, ndërsa në përputhshmëri me Marrëveshjen për furnizim publik, sistemi është dashur të implementohet deri 11.02.2013.
Komunikata e plotë e PSP-së për rastin “Tanku”
“Në rastin konkret ekziston dyshimi se me qëllim plotësimit të dëshirës së kryeministrit të atëhershëm për furnizim me makinë speciale, e dyshuara e parë ka inkurajuar të dyshuarin e dytë që të shfrytëzojë detyrën dhe autorizimet e tij dhe gjatë furnizimeve publike në mënyrë joligjore të favorizojë operatorë të caktuar ekonomikë dhe të blihet një makinë e atij lloji.
Njëkohësisht ekziston dyshimi se në kushte të uljes së fuqisë blerëse dhe ekonomike të Ministrisë, është vepruar në kundërshtim me nenin 36 nga Ligji për furnizime publike dhe në dokumentacionin e tenderit ka pasur më shumë specifikacione teknike që asocojnë në prodhim konkret me qëllim favorizimin e operatorit të caktuar ekonomik, pa u theksuar se mund të jepen edhe oferta tjera me specifikacione të cilët janë ekuivalente të kushteve të kërkuara në dokumentacionin e tenderit.
Ekziston dyshimi se i dyshuari i dytë në procedurën për furnizim publik, edhe pse ka qenë i vetëdijshëm se ka privilegjuar në mënyrë joligjore operatorë të caktuar ekonomikë , megjithatë, ka sjellë vendim për përzgjedhje të ofertës më të mirë dhe ka nënshkruar marrëveshje për furnizim publik në vlerë prej 29.852.542 denarë dhe TVSH në vlerë prej 5.373.458 denarë ose rreth 572.780 euro. /tesheshi.com/
