Nga Blendi Gashi
Edhe pse javë më parë është paralajmëruar se do të bëhet riformatimi i qeverisë “Mustafa”, një gjë e tillë ende nuk ka ndodhur.
Arsyeja kryesore pse nuk po ndodhin ndërrimet në ekzekutivin kosovar është Ministria e Drejtësisë, dikaster ky që ballafaqohet drejtpërdrejt me sistemin e drejtësisë në tërësi.
Dy partitë në pushtet PDK dhe LDK ende siç duket nuk janë dakorduar se kush duhet ta marrë në udhëheqje këtë dikaster të rëndësishëm, për më tepër raportohet se nuk po duan ta udhëheqin ministrinë në fjalë për shkak të funskionalizimit të Gjykatës Speciale.
Aktualisht kjo ministri i përket PDK-së, por ministri aktual i Drejtësisë, Hajredin Kuçi ka thënë se do tërhiqet nga kjo ministri, duke mos treguar arsyet.
Kërkesa e Kuçit për të mos vazhduar drejtimin e MD-së, raportohet se ka të bëjë faktin se Specialja pritet të ngrejë këtë vit aktakuzat e para ndaj ish-udhëheqësve të UÇK-së, pjesë e së cilës kanë qenë shumë zyrtarë të lartë të partisë më të madhe në vend, pjesë e së cilës është Kuçi. Por, ai ka mohuar këto raportime duke thënë se tërheqja e tij nuk ka të bëjë me Gjykatën Speciale.
“Se do të tërhiqem nga Ministria e Drejtësisë e kam shprehur kërkesën që në fillim të mandatit në koordinim me ish-kryetarin e Partisë Demokratike të Kosovës, Hashim Thaçi, dhe me kryetarin aktual, Kadri Veseli”, ka thënë Kuçi, kohë më parë për mediat.
A do ta udhëheq Gani Koci, ministrinë e Drejtësisë?
Për të marrë drejtimin e ministrisë së Drejtësisë janë përmendur shumë emra, Gani Koci nga PDK (aktualisht zv.ministër i Zhvillimit Ekonomik), Haki Demolli nga LDK (ministër i FSK-së) e emra të tjerë.
Portali mbarëkombëtarë tesheshi.com ka kontaktuar me Gani Kocin për të marrë një qëndrim nga ai, nëse mund të marrë apo jo drejtimin e MD-së dhe a është biseduar kjo çështje brenda PDK-së.
Koci ka thënë për portalin mbarëkombëtarë tesheshi.com se çështjen në fjalë nuk kanë diskutuar ende brenda partisë, por shprehet i gatshëm të zëvendësoj Kuçin në krye të Ministrisë së Drejtvsisë nëse për këtë post popozohet nga partia.
“Nuk e kemi biseduar ende këtë brenda partisë. Mirëpo, nëse partia konsideron dhe vlerëson se mund ta ushtroj këtë post, atëherë pse jo”, ka thënë Koci për tesheshi.com.
PDK e LDK s’pajtohet për Ministrinë e Drejtësisë
Një prej mundësive të mëdha është që Ministria e Drejtësisë të drejtohet nga partia LDK-ja, partia e kryeministrit Isa Mustafa.
Spas raportimeve të mediave kosovare PDK-ja i ka bërë ofertë LDK-së, me arsyetimin që ajo të merret drejtpërdrejt me zbardhjen e vrasjeve politike, për të cilat prej një kohe të gjatë ka pasur akuza se vrasjet në fjalë mund të jenë kryer nga dikush i afërt me PDK –në.
Portali tesheshi.com ka kontaktuar edhe me Bajram Gecaj, këshilltar i kryeminsitrit Isa Mustafa, për të marrë një përgjigje nëse PDK i ka ofruar LDK-së që ta drejtoi Ministrinë e Drejtësisë, por Gecaj nuk është deklaruar për këtë çështje.
“Nuk është një çështje me të cilën jam marrë”, ka thënë Gecaj, për tesheshi.com.
Për dallim nga Gecaj që nuk deklarohet për çështjen në fjalë, nënkryetari i LDK-së, Lutfi Haziri, në deklarimet e bëra për media ka pranuar se po negociohet për këtë çështje me PDK-në, ndonëse oferta nuk ka kaluar në planin zyrtar. Por, sekretari i përgjithshëm Basri Mumurati ka mohuar bisedimet me LDK-në, për udhëheqjen e MD-së.
Ndryshe, ditë më parë kreu aktual i Ministrisë së Drejtësisë, Hajredin Kuçi është kritikuar rëndë nga diplomati amerikan në Kosovës, Greg Delaëie dhe kreu i misionit të EULEX –it, Gabriele Meucci. Gjithçka ndodhi pas një deklarate të ministrit Kuçi në një emision televiziv, ku komentoi një vendim gjyqësor. /tesheshi.com/
