Nga Bashkim Kastrati
Festimi i golit duke rënë në sexhde i lojtarit të Kombëtares Shqiptare të Futbollit, Mërgim Mavraj, nxiti reagime të shumta tek një pjesë e personave publik në Shqipëri dhe Kosovë. Disa pa dhënë ndonjë arsye, deklaruan se nuk po ndjehen të përfaqësuar pasiqë Mavraj falënderoi Zotin, dhe pse ai tha se ka hyrë në ndeshje i lënduar dhe ka rrezikuar karrierën e tij për kombin.
“Nëse nuk rrezikon për kombin tënd, për kënd me rreziku tjetër?!”, ishin fjalët e Mavrajt, i cili tregonte dashurinë dhe sakrificën për kombin shqiptar.
Pas disa ditëve lojtarit i vdiq babai dhe të ndjerit iu bë një ceremoni mortore tradicionale shqiptare. Por disa media që kanë në agjendë ofendimin e atyre që përfaqësojnë islamin shfrytëzuan edhe këtë rast, siç veproi “gazetaexpress” online duke shpifur gjoja se arkivoli ishte mbuluar me flamur arab, por në fakt arkivoli ishte i mbuluar me një sixhade dhe kjo shihet qartë në fotografi.
Vendosja e sixhadesë mbi arkivol është një traditë që praktikohet në shumicën e ceremonive mortore nga një pjesë e madhe e shqiptarëve të Kosovës. Por nuk është hera e parë që kjo media online ka këtë qasje ndaj fesë islame.
Ky raportim i kësaj medie, ka nxitur reagime të personaliteteve të ndryshme dhe gazetarëve dhe është cilësuar si tendencioz dhe i realizuar pa asnjë konfirmim.
Kjo media dhe shpesh përqesh dhe ofendon imamë të ndryshëm të Kosovës, e veçanërisht imamin Shefqet Krasniqi. Rasti i fundit ishte kur Liga e Dijetarëve Myslimanë çertifikon dhe përkrahë imamin Shefqet Krasniqi, ndërsa titulli i shkrimit të Expressit ishte: “Qesharake: Liga e Dijetarëve Myslimanë çertifikon “dijetarin” Shefqet Krasniqi”.
Në tekst nuk shpjegohet se pse na qenka një e gjë e tillë qesharake dhe kush e vlerësoni si qesharake.
Profesori i gazetarisë dhe njëherësh themeluesi i Departamentit të Gazetarisë në Fakultetin e Filologjisë të Universitetit të Prishtinës, Milazim Krasniqi, ka thënë për tesheshi.com se në Kosovë është instaluar, veçmas këto dy vitet e fundit, një frymë e islamofobisë agresive, që është një aleancë e disa medieve, disa strukturave politike e policore dhe disa qarqeve të huaja diplomatike dhe që po synon të përdorë jo vetëm rastet e ekstremizmit, po çfarëdo rasti që mund të manipulohet, për të bërë presion mbi besimtarët myslimanë dhe për të kufizuar liritë dhe të drejtat e tyre fetare.
“Unë kam shkruar me vite dhe shkruaj ende për këto probleme. (Dhe i vuaj pasojat e sulmeve dhe fyerjeve më brutale, që prodhojnë mendjet e çoroditura.) Pra, nuk mund të flitet për një rast të izoluar dhe as një medium të vetëm, që e ka lart në agjendë islamofobinë”, ka thënë profesori Krasniqi.
Ai thotë se raportimi me rastin e varrimit të babait të Mërgim Mavrajt, ku u shkrua se ishte vendosur flamuri arab mbi arkivol pa asnjë konfirmim, është një lloj hakmarrje që po i bëhet lojtarit për shkak se hapur ka shpërfaqur identitetin e tij fetar.
“Fatkeqësisht nuk lihen jashtë kësaj agjende islamofobike as të vdekurit, siç ishte rasti me babain e ndjerë të lojtarit shqiptar, Mërgim Mavrajt. Mua mu duk si hakmarrje për “guximin” e tij që ta shprehë identitetin e tij fetar, krahas atij kombëtar. Fatkeqësisht, jemi si në mes të shtrëngatës. Dhe besoj që do të përjetojmë edhe shumë sprova nga ky revansh hakmarrës i islamofobisë agresive e primitive”, theksoi Krasniqi.
Babai i Mërgimit u varros në prani të flamurit kombëtar dhe të Kosovës
Në lidhje me raportimin e pa konfirmuar dhe tendencioz se babai i Mërgim Mavrajt u varros me flamur arab, ka reaguar edhe imami i njohur në Shqipëri Ahmed Kalaja, i cili ishte prezent në ceremoninë e varrimit. Ai në një postim në llogarinë e tij në Facebook ka sqaruar se mbi arkivol ka qenë vetëm sexhadja siç shihet në foto, ndërsa ka kërkuar nga gazeta “Express” që të kërkojë falje.
“Nisur nga një titull në një rrjet social, që babai i mbrojtësit të Kombëtares Mërgim Mavraj, përcillet me flamur arab është sa i pasaktë, aq dhe dashakeq. Rasti i radhës nuk kurseu as ditën e varrimit, jashtë çdo tradite shqiptare, jashtë çdo tradite morale, respekti ndjeshmërie. Dua të bej një sqarim për të gjithë: Babai i Mërgimit, një njeri i urtë për të cilin gëzonin respekt i madh e i vogël, u varros duke u mbuluar me sexhaden e tij të faljes, një dëshirë e tij kjo. Në varrezën e fisit Mavraj, ku në hyrje të varrezave valëviteshin dy flamuj shqiptarë, ku qëndronin tre dëshmorë të UÇK-së të familjes Mavraj. Mes lotëve dhe lutjeve përcollëm këtë burrë të thjeshtë, atdhetar të flaktë, si edhe një besimtar shembullor.
Mërgimi në plagën e ndarjes nga jeta të babait, përballet me shpifje të një natyre antikombëtare të një portali, i cili në minimumin moral duhet të kërkojë falje. Ne i bashkëngjitmi me lutje dhimbjes së vëllait tonë dhe shikojmë me neveri titujt bombastike në kurriz të ndjenjave edhe dhimbjeve”, ka shkruar Kalaja./tesheshi.com/
