Çdo spektakël i madh e ka të nevojshëm një teatër që të celebrohet. Juventusi dhe Barcelona do të luftojnë sot për të “pushtuar” Europën në “Olimpiastadion” të Berlinit.
Impianti i kryeqytetit është një nga më madhështorët në botë dhe ka mirëpritur evente shumë të rëndësishme me të cilat do të njiheni më poshtë.
Ky stadium është ndërtuar në kuadër të Lojërave Olimpike të vitit 1936 dhe në vitet e para ka qenë një nga simbolet e lulëzimit të partisë fashiste gjermane. Historike është data 30 janar 1933, kur ish-diktatori Adolf Hitler u celebrua si kancelari i ri i Gjermanisë, transmeton ‘Panorama Sport’.
Sporti është një metaforë e bukur dhe në impiantin ku do të luhet finalja e madhe e Champions-it nuk kanë munguar ngjarjet që kanë lënë gjurmë në sport dhe jo vetëm. “Olimpiastadion” është projektuar nga arkitekti Uorner Marsh, i cili në vitin 1934 kishte idenë brilante për ndërtimin e këtij impianti, që fillimisht kishte një kapacitet prej 10 mijë vendesh.
Atleti i parë që shijoi suksesin në stadiumin e Berlinit ishte amerikani Xhesi Ouens, i cili fitoi katër medalje ari në këto disiplina: kërcim së gjati, garën 100 e 200 metrave dhe stafetën 4X100.
Në impiantin e Berlinit ruajnë kujtime të bukura edhe italianët. Kombëtarja e Vitorio Pocos fitoi medaljen e artë, ndërsa në vitin 2006, të kaltrit e drejtuar nga Marçelo Lipi festuan kundër Francës Kupën e Botës, pas ekzekutimit të penalltive. Nga viti 1963, viti i themelimit të Bundesligës, në “Olimpiastadion” luan skuadra e Hertës së Berlinit. Ky impiant ishte më i madhi në Botërorin e vitit 1974, ku janë luajtur tri sfida.
Aktualisht, stadiumi i Berlinit ka një kapacitet prej 74.400 spektatorësh dhe sot e gjithë vëmendja e sportdashësve anembanë botës do të jetë pikërisht e përqendruar në “Olimpiastadion”, ku sigurisht emocionet do të jenë edhe një herë tjetër shumë të forta./tesheshi.com/
