Zinedine Zidane është futbollisti i fundit që në të kaluarën ka fituar “Topin e Artë”, ndërsa tani menaxhon një skuadër profesionale. Në të kaluarën e kanë bërë një gjë të tillë edhe Franz Beckenbauer, Luis Suarez, Marco Van Basten, Lothar Mattheus, Kevin Keegan, Hristo Stoichkov dhe Michael Platini.
“Tesheshi.com”, u sjell aventurën e lojtarëve më të mirë në botë në postin e kryetrajnerit:
Franz Beckenbauer (1972/76)
Dështimi i kombëtares gjermane në Europianin e vitit ‘84, e solli në krye të shtabit teknik, ish-futbollistin e njohur, Franz Beckenbauer. Ndeshja e tij debutuese ndaj Argjentinës, nuk shkoi edhe aq mirë, pasi Jose Ponce, me një dy golësh dhe Burruchaga, me një tjetër, ia prishën debutimin. Ndërkohë, katër vite më pas, Gjermania iu revanshua Argjentinës, duke i marrë titullin e Kupës së Botës, në finalen e zhvilluar në Itali. Karriera e tij si trajner përfundoi pas barazimit ndaj Olimpique Marseille, me skuadrën gjermane Bayern Munich.
Luis Suarez (1960)
Spanjolli hapat e parë të karrierës i nisi tek të rinjtë e Genoas. Në verën e vitit 1974, pranoi një ofertë nga presidenti Frailozzi, për të drejtuar Interin. Pasi përfundoi sezonin në pozitën e katërt, Suarez u largua nga klubi, meqenëse nuk kishte arritur pritshmëritë. Aventurat e tij në kampionatin italian, vazhduan me skuadrën e Cagliarit, derisa më vonë morri drejtimin e përfaqësueses U-21 të Spanjës, duke fituar Kampionatin Europian të vitit 86 dhe më pas morri drejtimin e përfaqësueses A, në Botërorin e mbajtur në Itali, gjatë vitit 1990.
Marco Van Basten (1988, 89 dhe 92)
Pas një mini-aventure në skuadrën e dytë të Ajaxit, Marco Van Basten, u emërua trajner i kombëtares holandeze, me të vetmin qëllim, ringritjen e “tulipanëve”, në piadestalin më të lartë të futbollit. Pasi udhëhoqi portokallinjtë në Botërorin e vitit 2006 dhe Europianin e vitit 2008, Van Basten drejtoi disa skuadra holandeze, Ajax, Heerenveen dhe AZ Alkmaar.
Lothar Matthaus (1990)
Futbollisti, i cili ka luajtur në pesë kampionate botërore, aventurën e tij në rolin e trajnerit e nisi tek skuadra austriake, Rapid Wiena. Matthause mori skuadrën për ti rikthyer shkëlqimin në futbollin austriak që kishte dikur, mirëpo nuk arriti të fitonte kampionatin dhe më pas u largua nga klubi. Gjermani, më vonë drejtoi kombëtaren e Hungarisë dhe Bullgarisë, derisa ishte trajner edhe në skuadrat: Partizan dhe Atletico Panaraense.
Kevin Keegan (1978/79)
Kevin Keegan nuk mundi ti rezistojë thirrjes së skuadrës, në të cilën e kishte mbyllur karrierën si futbollist, në Newcastle United, duke zëvendësuar kështu legjendën e futbollit argjentinas, Osvaldo Ardiles. Pasi ia doli të rikthejë në elitë “laraskat” dha dorëheqjen, derisa më vonë udhëhoqi edhe skuadra të tjera angleze si: Fulham dhe Manchester City, për të mbyllur sërish karrierën aty ku e nisi, në Newcastle United.
Hristo Stoichkov (1994)
Njëri ndër lojtarët më energjik brenda fushë së lojës në vitet 90, mori përsipër drejtimin e vendit të tij (Bullgarisë), në vitin 2004, mirëpo nuk arriti asnjë sukses dhe pas 22 ndeshjeve u largua. Në vitin 2007, erdhi në krye të skuadrës spanjolle Celta Vigo, mirëpo nuk arriti ta evitonte rënien nga kategoria, derisa vite më vonë drejtoi skuadrën afrikane, Mamelodi Sundowns dhe atë bullgare, Litex Lovech.
Michel Platini (1983, 84 dhe 85)
Tre herë fituesi i “Topit të Artë”, karrierën e nisi duke drejtuar kombëtaren e vendit të tij, Francën dhe në ndeshjen debutuese mposhti Norvegjinë, falë golit të Jean Pierre Papin. Pasi nuk arriti të kualifikojë Francën për në Kampionatin Botëror të vitit 1990, eliminoi Spanjën në Europianin e vitit 1992. Dy barazime, ndaj Suedisë dhe Anglisë, si dhe një disfatë ndaj Danimarkës, i dhanë fund etapës së tij si trajner. Tani radha është për Zinedine Zidanen, që historinë e tij fillon ta ndërtojë nga Santiago Bernabeu./tesheshi.com/
