Avokati Ngjela, pranuar nga vetë kryeministri Rama si pjesë e koalicionit qeverisës, ka kritika të ashpra për mënyrën sesi ai po qeveris e sidomos përsa i takon aleancës me LSI-në. Analiza e tij në një intervistë për median, shkon deri në parashikimin e një fundit të shpejtë për “lidhjen” mes dy partive, pasi “koalicioni qeverisës nuk ka të ardhme, kryesisht për shkak të përplasjes për ndarjen e pushtetit”.
Ngjela shprehet se për shkak të mosmarrëveshjeve mes PS-së dhe LSI-së janë bllokuar reformat më të rëndësishme në vend. “PS-LSI është një koalicion pa vlerë, pasi janë bllokuar reformat dhe nuk ka pasur barazi politike, që në momentet e nisjes. LSI i ka marrë PS-së ministri të rëndësishme si atë të Transporteve, Bujqësisë. Ky është një koalicion me fund të shpejtë”, deklaron avokati.
Ai nuk kursen kryeministrin Rama, pasi i pyetur përse ai nuk e zgjidh këtë ngërç që ka me LSI-në, Ngjela thotë se është paaftësi politike. “Rama nuk është politikan. Të shohim ç’do të bëjë”, thotë ai. /tesheshi.com/
